Autoriteti irlandez i të dhënave informon homologët e tij të BE-së se do të bllokojë platformën që të dërgojë të dhënat e përdoruesve në SHBA.

Europianët rrezikojnë të shohin që shërbimet e mediave sociale Facebook dhe Instagram të mbyllen këtë verë, pasi rregullatori i privatësisë në Irlandës përsëriti urdhrin e tij për të ndaluar fluksin e të dhënave të firmës drejt Shteteve të Bashkuara.

Komisioni Irlandez për Mbrojtjen e të Dhënave informoi të enjten homologët e tij në Europë se do të bllokojë pronarin e Facebook-ut, Meta, nga dërgimi i të dhënave të përdoruesve nga Europa në SHBA.
Projektvendimi i rregullatorit irlandez godet mjetin e fundit ligjor të Metës për të transferuar pjesë të mëdha të të dhënave në SHBA, pas vitesh betejash të ashpra gjyqësore midis gjigantit të teknologjisë amerikane dhe aktivistëve europianë të privatësisë.

Gjykata Evropiane e Drejtësisë në vitin 2020 anuloi një pakt BE-SHBA të rrjedhjes së të dhënave, të quajtur Mburoja e Privatësisë, për shkak të frikës mbi praktikat e mbikëqyrjes në SHBA. Në vendimin e saj, ajo e bëri gjithashtu më të vështirë përdorimin e një mjeti tjetër ligjor që Meta dhe shumë firma të tjera amerikane përdorin për të transferuar të dhëna personale në SHBA, të quajtur Klauzola Standarde Kontraktuale (SCC). Vendimi i kësaj jave jashtë Irlandës do të thotë se Facebook është i detyruar të mos mbështetet gjithashtu në SCC.

Meta ka paralajmëruar vazhdimisht se një vendim i tillë do të mbyllte shumë shërbime të tij në Europë, përfshirë Facebook dhe Instagram.

“Nëse një kornizë e re e transferimit të të dhënave transatlantike nuk miratohet dhe ne nuk jemi në gjendje të vazhdojmë të mbështetemi në SCC ose të mbështetemi në mjete të tjera alternative të transferimit të të dhënave nga Europa në Shtetet e Bashkuara, ka të ngjarë të mos jemi në gjendje të ofrojmë një numër të rëndësishmëm të produkteve dhe shërbimeve, duke përfshirë Facebook dhe Instagram, në Europë”, tha Meta në një dosje në Komisionin e Letrave me Vlerë dhe Shkëmbime të SHBA në mars të këtij viti.

Urdhri i bllokimit irlandez, nëse konfirmohet nga Grupi i Rregullatorëve Kombëtarë Europianë për Pbrojtjen e të Dhënave, ka të ngjarë të shkaktojë një ftohje edhe në komunitetin më të gjerë të biznesit, i cili po vret mendjen për të gjetur se si të vazhdojë dërgimin e të dhënave nga Europa në SHBA, sipas BE-së, sipas vendimit të Gjykatës së të Drejtave të Njeriut në Strasburg në 2020, raporton Zoom.al.

BE dhe SHBA janë në mes të negociatave për një tekst të ri të transferimit të të dhënave që do t’i lejonte kompanitë si Meta të vazhdojnë të dërgojnë të dhëna përtej Atlantikut, pavarësisht kërkesës irlandeze. Brukseli dhe Uashingtoni në mars ranë dakord për një marrëveshje paraprake në nivel politik, por negociatat mbi gjurmët e imta ligjore kanë ngecur dhe një marrëveshje përfundimtare nuk ka gjasa të arrihet para fundit të vitit.

Një zëdhënës i DPC-së irlandeze konfirmoi se projektvendimi u ishte dërguar rregullatorëve të tjerë europianë të privatësisë, të cilët tani kanë një muaj për të dhënë kontributin e tyre, por nuk do të diskutonin detajet e vendimit.

“Ky projektvendim, i cili është subjekt i shqyrtimit nga Autoritetet Europiane për Mbrojtjen e të Dhënave, ka të bëjë me një konflikt të ligjit të BE-së dhe SHBA-së, i cili është në proces zgjidhjeje”, tha një zëdhënës i Meta-s. “Ne mirëpresim një marrëveshje BE-SHBA për një kuadër të ri ligjor që do të lejojë transferimin e vazhdueshëm të të dhënave përtej kufijve dhe ne presim që ky kuadër të na lejojë të mbajmë të lidhur familjet, komunitetet dhe ekonomitë.” /Politico.eu – Përgatiti në shqip Zoom.al