Partia Demokratike ka reaguar pas shpërthimit të tritolit në biznesin e kanditatit në zgjedhjet lokale të 6 Marsit, Xhemal Bushati.Në një deklaratë të lëshuar për mediat PD ka dënuar me sulmin me eksploziv ndaj pronës së Bushatit duke theksuar se familja e tij për fat të mirë nuk ka pësuar lëndime.

‘‘Për fat të keq, gjendja e sigurisë në Shkodër ka vetëm përkeqësim për shkak të aleancës së qeverisë me krimin.”-thuhet në deklaratë.

Deklarata:

Partia Demokratike dënon me ashpërsi sulmin me eksploziv ndaj pronës së kandidatit demokrat për bashkinë e Shkodrës Xhemal Bushati.

Për fat të mirë, familja e zotit Bushati, që banon në të njëjtën godinë, nuk ka lëndime fizike, por ngjarja është tronditëse për ta dhe për qytetarët e Shkodrës. Për fat të keq, gjendja e sigurisë në Shkodër ka vetëm përkeqësim për shkak të aleancës së qeverisë me krimin.

Partia Demokratike u kërkon organeve ligjzbatuese të zbulojnë përgjegjësit e këtij agresioni, që prek drejtpërsëdrejti zotin Xhemal Bushati, një nga personalitetet më të respektuar të qytetit të Shkodrës.

Kush mendon se mund të përkulë demokratët me sulme direkte ose indirekte, i ka bërë llogaritë gabim!/Zoom.al