Anija, e operuar nga organizata bamirëse Open Arms, u mbajt në det për gati tre javë përpara se të lejohej të ankorohej në ishullin Lampedusa pas një urdhri gjykate.

Salvini, i cili në atë kohë ishte ministër i Brendshëm, mohon akuzat për rrëmbim dhe shpërdorim detyre.

Të shtunën, ai tha se donte të ndalonte që Italia të bëhej një “kamp refugjatësh për të gjithë Evropën” dhe e deklaroi veten “fajtor për mbrojtjen e Italisë dhe italianëve”.

Anija “Opens Arms” mbante 147 emigrantë të cilët ishin kapur në brigjet libiane kur u pengua të ankorohej në Lampedusa.

Ishulli ka qenë gjatë viteve të fundit një pikë zbarkimi për mijëra emigrantë që përpiqen të hyjnë në Evropë.

Si ministër i brendshëm, Salvini zbatoi një politikë të “porteve të mbyllura” që ai argumentoi se do të hiqte stimujt për kontrabandistët e njerëzve.

Anëtarët e ekuipazhit kanë dëshmuar gjatë gjyqit se mirëqenia dhe kushtet sanitare e migrantëve në bordin e anijes u përkeqësuan ndërsa ajo po mbahej në det të hapur – duke rezultuar, ndër të tjera, në një shpërthim zgjebe.

Prokurori Geri Ferrara i tha gjykatës së Siçilisë se ekzistonte “një parim kyç që nuk është i diskutueshëm”.

“Midis të drejtave të njeriut dhe mbrojtjes së sovranitetit shtetëror, janë të drejtat e njeriut ato që duhet të mbizotërojnë në sistemin tonë për fat të mirë demokratik”, tha ai.

Në janar, Salvini dëshmoi se kishte kuptuar se “situata [në anije] nuk ishte në rrezik”.

Një vendim në gjyqin, i cili filloi në tetor 2021, mund të dalë muajin e ardhshëm. Nëse shpallet fajtor, Salvini gjithashtu mund të bllokohet nga mbajtja e posteve qeveritare.

Salvini tha se “të mbrosh Italinë nuk është krim dhe nuk do të dorëzohem as tani, as kurrë”.

“Falë veprimeve të qeverisë sime, zbarkimet, vdekjet dhe zhdukjet në Detin Mesdhe u ulën”, tha ai.

“Kjo anije spanjolle nuk u pengua kurrë të shkonte askund, përveç në Itali. Ne nuk mund të ishim më kampi i refugjatëve për të gjithë Evropën.

Asnjë qeveri dhe asnjë ministër në histori nuk është akuzuar apo gjykuar për mbrojtjen e kufijve të vendit të tij.

Sipas të dhënave të OKB-së, mbërritjet detare në Itali ranë në 11,471 në vitin 2019, dukshëm më e ulët se shifrat në vitet para ose pas.