Ushtria izraelite tha se avioni i saj sulmoi një qendër operacionale në Khan Younis që i përkiste Hamasit dhe se kishte marrë hapa për të zbutur rrezikun e dëmtimit të civilëve.

Banorët vendas thanë se tre sulme kishin në shënjestër tendat që strehonin njerëz të zhvendosur në zonën humanitare të al-Mawasi, në perëndim të qytetit të Khan Younis, duke shkaktuar kratere të thella shtatë metra.

“Dyzet njerëz u vranë dhe më shumë se 60 u plagosën, ndërsa shumë janë ende nën rrënoja”, tha drejtori i operacioneve të autoritetit të Mbrojtjes Civile të Hamasit për BBC.

Dëshmitarët okularë thanë se shpërthime të mëdha tronditën zonën e al-Mawasi pak pas mesnate.

Videot treguan civilë që gërmonin nëpër rërë me duar në përpjekje për të shpëtuar palestinezët nga një gropë të thellë të shkaktuar nga sulmet ajrore.

Në një deklaratë, një zëdhënës i Forcave të Mbrojtjes të Izraelit (IDF) tha se ushtria kishte sulmuar “terroristë të rëndësishëm të Hamasit që vepronin brenda një qendre komandimi dhe kontrolli të ngulitur brenda Zonës Humanitare në Khan Yunis”.

“Para sulmit, u ndërmorën hapa të shumtë për të zbutur rrezikun e dëmtimit të civilëve, duke përfshirë përdorimin e municioneve precize, mbikëqyrjen ajrore dhe mjetet shtesë”, shtoi zëdhënësi.

“Organizatat terroriste në Rripin e Gazës vazhdojnë të abuzojnë sistematikisht me infrastrukturën civile dhe humanitare, duke përfshirë Zonën e caktuar Humanitare, për të kryer aktivitete terroriste kundër Shtetit të Izraelit dhe trupave të IDF.”

Hamasi hodhi poshtë pretendimet e ushtrisë izraelite se luftëtarët e saj ishin të pranishëm në zonë, duke e quajtur atë një gënjeshtër “të hapur”.

“Rezistenca ka mohuar disa herë që ndonjë nga anëtarët e saj ekziston brenda tubimeve civile ose po i përdor këto vende për qëllime ushtarake.”