Në një projektligj të depozituar në Kuvend, qeveria kërkon që “Paga mujore e gjyqtarit të Gjykatës Kushtetuese është e njëjtë me shumëzimin e koeficientit 0.96 me pagën e Presidentit të Republikës”.

Paga e Presidentit të Republikës është 425 mijë lekë në muaj. Kjo do të thotë se paga baza e gjyqtarëve të Kushtetueses do të jenë 408 mijë lekë në muaj.

Por ata do të përfitojnë dhe një shtesë për shkak të “natyrës” së punës me 58% mbi pagën.. Kjo e çon pagën mujore të një gjykatësi në Gjykatën Kushtetuese 644.6 mijë lekë në muaj.

Të njëjtën pagë do të marrin dhe gjyqtarët e kolegjit të Posaçëm të Apelimit, institucionit, që përcakton se kush qëndron në sistemin e drejtësisë dhe kush largohet prej tij.

Për kryetarët e të dy inastitucioneve, KPA-së dhe Gjykatës Kushtetuese ka dhe një shtesë tjetër 20 për qind, që e çon pagën e tyre mujore në 773 mijë lekë.

Drejtësia nuk ishte një ndër fushat që do të prekej nga Reforma e pagave që paralajmëroi kryeministri Edi Rama, por mesa duket planet kanë ndryshuar rrugës.

Së fundmi, GJK ka favorizuar shpeshherë qeverinë në çështjet gjyqësore ku ndër më të rëndat ishte ajo e padisë së opozitës mbi portin e Durrësit, që institucioni e quajti të ligjshme. /Zoom.al