Sipas ekspertëve të qarkullimit rrugor, dy vëllezër kanë qënë duke udhëtuar nga Bilishti në drejtim të Korçës dhe mjeti i tyre ka humbur kontrolllin dhe është përplasur me barrierën mbrojtëse në krahun e kundërt të rrugës.

Nga shpejtësia e madhe, mjeti tip BMW me targa AB 077 CF që drejtohej nga 21-vjeçari Kevi Sherifi, ka marrë përpara disa metra të barrierën mbrojtëse, e cila ka hyrë brenda mjetit duke i shkaktuar plagë të shumta 15-vjeçarit Rei Sherifit, që ndodhej në sedilien e pasagjerit.

Burime spitalore bëjnë me dije se i mituri ka gjetur vdekjen, sapo ka hyrë në reanimacion ndërkohë që vëllai i tij ndodhet nën kujdesin e mjekëve, në gjendje të rëndë por jashtë rrezikut për jetën. Goditja ka qenë aq e fortë sa mjeti është ndarë në disa pjesë.

Ekpertët e qarkullimit rrugor mendojnë paraprakisht se drejtuesi i mjetit në momentin e aksidentit mund të ketë kryer një parakalim të gabuar dhe nga shpejtësia tej normave të lejuara, e ka pasur të vështirë të mbajë mjetin nën kontroll dhe për pasojë është postuar, në krahun e kundërt të rrugës nacionale.

Njoftimi i Policisë:

Korçë/Informacion paraprak

Më datë 21.04.2023, rreth orës 12:05, në rrugën “Dishnicë-Çiflig”, shtetasi K. Sh., 21 vjeç, banues në fshatin Pojan, Maliq, duke drejtuar automjetin tip “BMW”, dyshohet se ka humbur kontrollin e drejtimit të automjetit dhe automjeti ka dalë nga rruga.

Për pasojë, janë dëmtuar drejtuesi K. Sh., i cili ndodhet nën kujdesin e mjekëve dhe shtetasi R. Sh.,15 vjeç, pasagjer në automjet, i cili pas mbërritjes në spitalin e Korçës, ka ndërruar jetë.

Grupi hetimor po kryhen veprimet procedurale dhe po punon për të përcaktuar shkaqet e daljes nga rruga.