Day ArchiveUshqimet që bëjnë mrekulli për tretjen në stomak

Është e rëndësishme të ruani një sistem të shëndetshëm tretës dhe për fat të mirë ka ushqime që ndihmojnë për këtë.

Disa prej tyre:

Bollgur

Bollguri është i shijshëm dhe i shëndetshëm, dhe gjithashtu është i pasur me fibra beta-glukane, e cila lidhet me bakteret e shëndetshme në sistemin tretës. Gjithashtu ngadalëson tretjen e ushqimit, prandaj jemi të ngopur më gjatë dhe në këtë mënyrë parandalohet ngrënia e tepërt.

Farat e lirit

Farat e lirit janë plot me fibra, dhe dihet gjithashtu se probiotikët dhe prebiotikët shpërbëhen nga trupi dhe kështu marrin baktere të mira të dobishme për sistemin tretës.

Arrat

Arrat, përveçse janë të shijshme, nxisin formimin e baktereve të mira, si dhe zvogëlojnë rrezikun e sëmundjeve të zemrës.

Kumbullat e thata

Kumbullat e thata përmbajnë fibra të patretshme dhe të tretshme. Të patretshmet stimulojnë jashtëqitjen e rregullt, ndërsa ato të tretshmet rregullojnë tretjen dhe thithin lëndët ushqyese nga ushqimi dhe kështu parandalojnë acarimin e zorrëve.

Rrushi i thatë

Ato janë gjithashtu plot me fibra të tretshme dhe prebiotikë, të cilët ndikojnë në ekuilibrin e mirë të florës së zorrëve, dhe nxisin krijimin e baktereve të mira, shkruan Pinkville./ Living

Argita Malltezi do të kandidojë për deputete në vitin 2025?

Vajza e ish-kryeministrit Sali Berisha, Argita Malltezi deklaroi se në zgjedhjet parlamentare të 2025 mund të bëhet pjesë e garës për deputete.

Gjatë një interviste në “Open”, ajo shpjegoi se këtë vendim do ta marrë vetëm nëse Berisha pengohet nga gara për deputet për shkak të masës në fuqi që ka ndaj tij.

“Unë do të kandidoj për deputete vetëm nëse ka një skenar për të ndaluar Sali Berishën që të kandidojë për deputet. Vetëm në këto kushte unë do të mendoj kandidimin, pasi nuk e kam si çështjes primare.

Fakti që Sali Berisha mbahet në një masë kaq të gjatë arresti tregon se ka një skenar për të mos e lejuar që të kandidojë.

Nuk ka ndodhur kurrë që të vendoset një masë arresti pa u pyetur më parë personi që po hetohet”, tha Malltezi.

Horoskopi i dashurisë për çiftet dhe beqarët deri më 25 shtator

Dashi

Dashuria është një slitë për Dashin këtë javë. Çiftet mund të ndihen më të afërt se zakonisht, por do të duhet të shmangin debatet e panevojshme. Është koha për të rizbuluar pasionin, ndoshta me një gjest spontan. Beqarët nga ana tjetër do pushtohen nga një valë sharmi. Nëse po kërkoni diçka kuptimplotë, hapeni zemrën dhe lërini emocionet t’ju udhëheqin. Këshilla? Jini të guximshëm por të durueshëm, jo ​​gjithçka ndodh menjëherë.

Demi

Demi këtë javë ndjen nevojën për stabilitet dhe siguri në dashuri. Çiftet do të gjejnë rehati në rutinën e përditshme, por nuk duhet të harrojnë të kultivojnë momente butësie. Një gjest i vogël ose një fjalë e mirë mund të bëjë mrekulli. Për beqarët, dashuria mund të lindë në një kontekst të njohur ose të njohur. Lini zonën tuaj të rehatisë dhe hapuni ndaj mundësive të reja. Këshillë: Mos kini frikë të tregoni dobësinë tuaj.

Binjakët

Për Binjakët, java do të sjellë qartësi në sferën e dashurisë. Çiftet do të ndihen të lidhur, por mund të kenë nevojë të flasin hapur për ndjenjat që nuk janë shprehur. Është koha për të qenë i sinqertë. Beqarët, nga ana tjetër, mund të gjejnë dikë interesant përmes një ngjarjeje shoqërore ose një miqësie të re. Këshilla për ju është: ndiqni kuriozitetin tuaj, dashuria shpesh vjen nga drejtime të papritura.

Gaforrja

Këtë javë Gaforrja është e ndjeshme dhe e gatshme për të ndërtuar lidhje të thella. Në çifte, është e rëndësishme të shmangni keqkuptimet: mos lejoni që ndjeshmëria juaj natyrore të krijojë keqkuptime. Komunikoni hapur nevojat tuaja. Për beqarët, dashuria mund të shfaqet nga një mik apo një i njohur i vjetër. Jini të hapur ndaj mundësive të reja, edhe nëse ato vijnë nga situata të papritura. Këshillë: Mos kini frikë të hapeni plotësisht me ata që ju interesojnë.

Luani

Luanët do përjetojnë një javë plot pasion. Çiftet do të ndiejnë dëshirën për të rizgjuar bashkëndarjen e lumturisë dhe intimitetin. Kjo është një kohë e mirë për të planifikuar një mbrëmje të veçantë. Beqarët nga ana tjetër do jenë në qendër të vëmendjes dhe do tërheqin lehtësisht persona të rinj. Por kini kujdes: mos u kapni shumë nga egoja. Këshilla për ju është: mbani mend se dashuria ushqehet nga ndarja, jo vetëm admirimi.

Virgjëresha

Virgjëresha do ketë një javë reflektuese dhe plot nostalgji në dashuri. Çiftet mund ta gjejnë veten duke diskutuar planet e ardhshme ose duke ripërcaktuar kufijtë e tyre, gjë që mund të sjellë stabilitet të ri. Beqarët, nga ana tjetër, mund të gjejnë një flakë të vjetër ose të ndihen të tërhequr nga dikush që vlerëson vëmendjen e tyre ndaj detajeve. Këshillë: mos jini shumë kritik as me veten, as me të tjerët, dashuria ka nevojë për spontanitet.

Peshorja

Për Peshoren, dashuria këtë javë do të jetë e ëmbël dhe harmonike. Çiftet do të përjetojnë momente të lidhjes së madhe emocionale dhe do mund të zgjidhin mosmarrëveshjet e vogla nga e kaluara. Nëse jeni beqarë, mund të takoni dikë që reflekton dëshirën tuaj për ekuilibër dhe bukuri. Këshilla është të mos nxitoni: lërini gjërat të zhvillohen natyrshëm, duke shijuar procesin pa u përpjekur të kontrolloni çdo detaj.

Akrepi

Akrepi do të ndiejë intensitet të thellë emocional këtë javë. Çiftet mund të eksplorojnë nivele të reja intimiteti, por duhet të jenë të kujdesshëm që të mos bien në xhelozi. Është koha për të kultivuar besimin reciprok. Beqarët do jenë simpatikë dhe misteriozë, duke tërhequr njerëzit që vlerësojnë thellësinë e tyre. Këshilla për ju është të mos keni frikë të tregoni veten të pambrojtur: edhe brishtësia mund të jetë një forcë e madhe në dashuri.

Shigjetari

Shigjetari do përjetojë një javë dinamike në dashuri. Çiftet do ndiejnë nevojën për aventura dhe për të dalë nga rutina. Kjo mund të çojë në përvoja të reja së bashku që do të forcojnë lidhjen. Beqarët mund të takojnë dikë në mënyrë të papritur gjatë një udhëtimi ose aktiviteti në natyrë. Këshillë: Ndiqni instinktet tuaja dhe mos kini frikë të jeni spontan. Dashuria është gjithashtu argëtim dhe zbulim, mos e merrni gjithçka shumë seriozisht.

Bricjapi

Këtë javë Bricjapi do të ndiejë nevojën për reflektim në dashuri. Çiftet mund të gjejnë rehati duke ndarë ëndrrat afatgjata, por është e rëndësishme të mos neglizhoni të tashmen. Beqarët nga ana tjetër do kenë mundësinë të takojnë dikë që ndan vlerat dhe synimet e tyre të jetës. Këshilla për ju është: mos nxitoni, lërini gjërat të zhvillohen me ritmin e tyre natyror dhe kushtojini vëmendje detajeve.

Ujori

Ujorët do të përjetojnë një javë kushtuar lidhjes mendore në dashuri. Çiftet do të gjejnë kënaqësi në diskutimin e ideve dhe planeve të së ardhmes, por do të duhet të jenë të kujdesshëm që të mos neglizhojnë anën emocionale të marrëdhënies. Beqarët mund të tërhiqen nga dikush që nxit kuriozitetin e tyre intelektual. Këshillë: Mos harroni se edhe emocionet kanë nevojë për hapësirë. Kërkoni një ekuilibër midis mendjes dhe zemrës suaj.

Peshqit

Për Peshqit, kjo javë do të jetë një kohë e ndjeshmërisë së madhe në dashuri. Çiftet do ndiejnë një lidhje të fortë emocionale, por është e rëndësishme që të mos pushtoheni nga emocionet. Çelësi do të jetë komunikimi i hapur. Beqarët, nga ana tjetër, mund të tërhiqen nga dikush që kupton natyrën e tyre të thellë dhe romantike. Këshilla është të dëgjoni zemrën tuaj, por pa e humbur realitetin. Një ekuilibër midis ëndrrës dhe konkretitetit do të bëjë diferencën.

Martesa e tij mori fund prej tradhtisë? Reagon për herë të parë Arben Derhemi

Aktori Arben Derhemi reagoi për herë të parë pas lajmeve që qarkulluan për ndarjen e tij nga bashkëshortja, Iva Korumi.

Në rrjetet sociale, Arben Derhemi shprehu indinjatë për lajmet që u publikuan kudo, duke shtuar se individë të caktuar, përmes thashethemeve, kërkojnë të bëhen personazhe.

“Po si ka mundësi të jemi kaq gjakatarë…Unë e kuptoj që kur njeriu është i parealizuar dhe nuk di ç’seksi i përket akoma në moshën 40-vjeçare gjen mundësi nëpërmjet thashethemeve për t’u bërë personazh (për mirë apo për keq), por kur të gjithë kustitë mediatike (portalet) duan gjak…më bën përshtypje sa problem e kemi si racë e pastër arjane që jemi…Për të mira dhe gëzime”, shkruan aktori.

Një ditë më parë u raportua se Arben Derhemi kishte tradhtuar bashkëshorten e tij, Iva Korumi dhe për këtë arsye martesa e tyre kishte marrë fund.

Berisha zbulon nëse do të bashkëpunojë me Metën në zgjedhjet e 2025

Partia Demokratike dhe Partia e Lirisë do të vijojnë bashkëpunimin politik si aleate edhe në zgjedhjet parlamentare që do të mbahen vitin e ardhshëm.

Gjatë një interviste në “Opinion”, Berisha deklaroi se marrëdhëniet politike me Metën janë shumë të mira, duke shtuar se ve

Sali Berisha: Me zotin Metën kam raporte shumë të mira. Bashkëpunimi në zgjedhje do të jetë i ngushtë, si midis një koalicioni që ecën drejt fitore

Një shoqëri dhe klasë politike hipokrite!

Nga Mentor Kikia

Një shoqëri dhe klasë politike hipokrite!

Së pari, ngushëllime familjes së Gerti Bogdanit dhe, nëse ngushëllimi im ndikon sado pak në lehtësimin e dhimbjes së madhe, jam pranë bashkëshortes, fëmijëve dhe pjestarëve të tjerë të familjes në çdo pikë loti që po derdhin për humbjen e njeriut të tyre të shtrenjtë.

Prej dy ditësh kam lexuar kaq shumë vlerësime pozitive për Gertin nga miqtë dhe shokët, të afërmit, ata që e njohin shumë mirë. Bashkëpunëtorët e tij në parti, thuajse të gjithë, nga kryetari deri tek anëtarët e thjeshtë që kishin patur mundësi ta njihnin. Deputetët të tjerë të parlamentit, pavarësisht partive që u përkasin, gazetarë dhe njerëz të tjerë publik, fjala e të cilëve ka peshë në atë që quhet apo përbën “opinionin publik”. Por edhe shumë qytetarë të thjeshtë, pa angazhime politike e intelektuale. Kjo u pa edhe në vargun e gjatë të njerëzve që shkuan ti vënë një “dorë mbi krye” në përcjelljen e fundit.

-Njeri i drejtë
-Njëri i përkryer
-Bashkëshort dhe prind model
-Diplomuar në të gjitha nivelet arsimore me “Medalje Ari”
-Politikan i një gjenerate dhe shkolle të re
-Politikan model
-Politikan me integritet
-Përfaqësues i një brezi të shkëlqyer
-I pakorruptuar
-Jo konfliktual
-Vizionar e i drejtë
-Idealist dhe i përkushtuar
-Më i miri “ndër ne”
……..
Po mirë, kur Gerti Bogdani kishte tërë këto cilësi, përse nuk ishte ende në atë parlament?

Përse nuk e futën në listë ata që i kishin në dorë, apo përse nuk e votuan ata që e kishin në dorë?

Përse demokratët nuk e zgjodhën në forumet më të larta drejtuese të partisë së tyre të lodhur, që po tërhiqet zvarrë?

Tek e fundit, përse nuk ia besuan drejtimin e partisë “djalit të pastër, vizionar e idealist”, kur partia ka mbetur me sytë nga qielli e ballkoni njëkohësisht?

Në 2022 ai garoi në primaret e PD-së në Tiranë, për të qenë kandidat për zgjedhjet për kryetar bashkie që u mbajtën në 2023, por anëtarësia nuk e votoi.

Derisa ai ishte jo agresiv, jo sherrxhi, por i paqtë e përbashkues, përse nuk e zgjodhën kryetar të parlamentit, kur ai institucion ka patur kaq shumë nevojë për njerëz të tillë?

Derisa Gerti ishte një njeri dhe familjar model, përse ai nuk ishte në drejtimin e ndonjë institucioni të rëndësishëm, por janë mbushur zyrat me burra që mbajnë hareme vartësesh në administratë?

Unë Gertin e njihja në distancë dhe me aq sa e njihja ndaj vlerësim pozitiv. Dhe besoj se lumi i fjalëve të mira që u tha është i merituar.

Megjithatë, në këtë rast ka vetëm dy mundësi:

Ose Gerti ishte vërtet një njeri me të gjitha këto cilësi, por ne jemi një shoqëri që nuk dimë të zgjedhim, nuk dimë të vlerësojmë dhe jemi të prirur nga e liga, nga tarafi, nga interesi.

Ose Gerti nuk ishte plotësisht ai që ne përcollëm sot, por në ditën e fundit të qëndrimit mbi tokë, ne e hapim thesin e lëvdatave dhe të “lajmë e të lyejmë”.

Në të dyja rastet, jemi një shoqëri hipokrite.
Hipokritë me veten, hipokritë me tjetrin!

Arbër Çepani rrëfen momentet e fundit të Gerti Bogdanit: Më thanë hajde se nuk është mirë

Kunati i Gerti Bogdanit, Arbër Çepani rrëfeu momentet e fundit të ish-deputetit demokrat në spital, pasi pësoi arrest kardiak.

Në studion e “Top Story”, Arbër Çepani tregoi se miqtë e njoftuan për problemin shëndetësor të Gertit dhe shtoi se pas telefonatës, mbërriti menjëherë në spital.

Aty, pasi pa 15 persona në përpjekje për të rikthyer në jetë Gerti Bogdanin, Arbër Çepani u bind se bëhej fjalë për diçka të rëndë dhe serioze.

“Sapo ndodhi ma thanë direkt, kaluan disa minuta pasi e gjetën në atë gjendje në tualet dhe e dërguan në spital. Hajde se nuk është mirë Gerti më thanë, nuk është ndjerë mirë dhe është në gjendje të fikti. Nuk e besoja kurrë që mund të kishte diçka të keqe, ishte më i forti ndër ne. Dukej sikur do na përcillte Gerti një nga një, se mendonim se do bënte këtë parakalim. Kur shkova në urgjencë mendova se ka ndonjë gjendje të fikti. Pashë skenën pastaj dhe ishin mbi kokën e Gertit mbi 15 veta që kërkonin ta mbanin dëshpërimisht në jetë, fillova të kuptoja se ishte gjëja serioze”, tha Arbër Çepani.

Vdekja e Gerti Bogdanit/ Arbër Çepani shkrehet në lot: Edlira priste mesazh prej tij

Disa orë pasi kunati i tij, Gerti Bogdani u përcoll për në banesën e fundit, Arbër Çepani rrëfeu për herë të parë në një intervistë televizive të gjithë përjetimet dhe dhimbjet që la pas kjo humbje.

Që në nisje të intervistës, Arbër Çepani u përlot e hera-herës qau me ngashërim, teksa përshkruante kunatin e tij si shokun e tij.

Ai rrëfeu se në këto orë të dhimbshme për familjen e tij, motra e tij, Edlira Çepani priste një mesazh nga bashkëshorti Gerti Bogdani sepse nuk e beson ndarjen e tij nga jeta.

“E kam të pamundur të flas për Gertin, por donte Edlira të isha këtu, dhe e di që do donte dhe ai që të isha këtu. Do doja të flisja për gjëra të tjera për Gertin, jo pasi bëmë funeralin. Por Edlira donte të isha këtu, që të flisnin njerëz që e donin dhe i donte.

Gertin se quaj dot kunat, e kisha dhe shok e kisha këshillues, ishte për ne si një mal, çdo problem të kishim e kishim Gertin si një mal, ta shikonim Gerin në atë gjendje, që nuk bënim dot asgjë për të… boshllëku është i pakuptueshëm fare.

Edlira mbante celularin në dorë, i thoja ma jep celularin ta mbaj unë, dhe më thoshte se ‘jo se mos më shkruan Gerti”. Shihte gjithmonë nga celulari se mos i shkruante. E kam të pamundur të jem sonte këtu, por donte Edlira”, tha Arbër Çepani me sytë e përlotur.

Korrupsioni me kontratat e mbetjeve po saboton turizmin në Vlorë

Për vite me radhë gjatë sezonit turistik, Vlora gdhihet e mbuluar nga tymi i plehrave që digjen në fushën e grumbullimit në periferi të qytetit.

Skenat apokaliptike të tymit që mbulojnë Vlorën, si ajo e 25 korrikut, i lënë gojëhapur turistët që vizitojnë qytetin dhe rrethinat e tij për të shijuar detin dhe i ka vënë në vështirësi operatorët turistikë. Banorët e qytetit ndërkohë vuajnë prej vitesh erën e rëndë që vjen nga fusha e mbetjeve dhe problemet shëndetësore që sjellin ato.

“Unë jam shumë larg, 1.5-2 kilometra në vijë ajrore, por natë për natë ne ndjejmë aromën e mbetjeve që digjen në fushën e mbetjeve në Vlorë,” thotë Niko Dumani, një aktivist lokal i mjedisit.

Dumani dyshon se djegia e përvitshme e mbetjeve në fushë të hapur është e qëllimshme dhe synon të eleminojë malin me mbetje, për shkak se planet për vënien në punë të landfillit të ri në Sherishtë dështojnë vit pas viti.

“Kjo po cënon drejtpërdrejt jetën e qytetarëve të Vlorës dhe atyre që vizitojnë qytetin, pasi mbetjet që digjen, kryesisht plastika, emeton dioksina dhe gazra të tjerë helmues,” shtoi ai.

Landfilli i Sherishtës është pjesë e një projekti të integruar për menaxhimin e mbetjeve në qarkun e Vlorës me vlerë 20.8 milionë euro i financuar nga KfW, nga të cilat 12.5 milionë euro janë kredi që paguhen nga qeveria shqiptare dhe pjesa tjetër grante.

Projekti iu besua kompanisë “Integrated Technology Services” të Klodian Zotos dhe ka ngecur në vendnumëro që prej sekuestrimit të kompanisë me vendim të Gjykatës së Posaçme dhe arratisjes nga drejtësia të pronarit të saj, i dënuar dy herë nga gjykata për korrupsion dhe pastrim parash me koncesionet e incineratorëve në Elbasan dhe Fier.

Punimet në landfillin e Sherishtës duhej të kishin përfunduar në vitin 2021 dhe zyrtarisht, përfaqësues të Bashkisë së Vlorës kanë deklaruar disa herë se landfilli do të vihet në punë.

Megjithatë, Bashkia e Vlorës i tha BIRN përmes një përgjigje me shkrim se nuk ka ende një projekt për mbylljen e punimeve që mbetën rrugës dhe as një afat për vënien në punë të landfillit.

“Përfundimi i punimeve të parealizuara do të mundësojë vënien në funksionim të Landfillit të Sherishtës, por nuk mund të parashikojmë në këtë moment një afat të saktë për përfundimin e punimeve dhe marrjen në dorëzim të impiantit nga ana e Bashkisë Vlorë,” thuhet në përgjigjen zyrtare.

Kriza mjedisore

Qyteti i Vlorës nuk është i vetmi në një situatë të emergjencës mjedisore, edhe pasi qeveria shqiptare shpenzoi miliona euro për koncesionet e ndërtimit të incineratorëve apo landfilleve si ai i Sherishtës, të cilët mbetën gjithashtu të papërfunduar.

Këto projekte ranë në duart e Klodian Zotos dhe partnerit të tij në biznes, Mirel Mërtiri dhe rrethit të tyre të ngushtë, tashmë të dënuar nga Gjykata e Posaçme për korrupsion dhe pastrim të produkteve të veprës penale.

Si rrjedhojë, inceneratori i Elbasanit punon vetëm pjesërisht duke sjellë një mal mbetjesh buzë lumit Shkumbin. Inceneratori dhe landfilli në Fier janë të papërfunduar dhe depozitimi i mbetjeve aty pa një impiant trajtimi të ujërave të ndotura e ka kthyer atë në një bombë ekologjike për zonën. Situata është e ngjashme edhe në Tiranë, ku incineratori nuk u ndërtua asnjëherë.

Punimet në landfillin e Sherishtës u bllokuan pas sekuestrimit të kompanisë “Integrated Technology Services” dhe është e paqartë se sa punë duhet për t’i përfunduar ato.

Aktivisti i mjedisit, Niko Dumani thotë se në takimet e bëra autoritetet pretendojnë se vetëm 7 për qind e projektit ka mbetur pa përfunduar. “Por se çfarë është ky 7% nuk e thotë njeri”, tha Dumani, ndërsa vuri në dyshim pretendimet e ngritura.

Bashkia e Vlorës po ashtu nuk është në gjendje të thotë se çfarë ka mbetur pa përfunduar nga projekti dhe sa do kushtojnë këto punime shtesë. Në përgjigje të kërkesës për informacion, Bashkia i tha BIRN se po bashkëpunon me një konsulent teknik për të mundësuar rifillimin e punimve të ngecura që prej vitit 2021, duke lënë të kuptohet se edhe për ta është e paqartë se çfarë punimesh duheshin kryer.

“Konsulenti Teknik është duke punuar për përgatitjen e projekteve të punimeve të parealizuara ende të Komponentit ” Ndërtimi i Landfillit të Sherishtës ” dhe si dhe të Komponentit “Mbyllja e vend depozitimeve ekzistuese”. Në përfundim të këtyre projekteve, do të kemi një parashikim të plotë dhe të saktë të punimeve që janë për t’u kryer dhe kostot përkatëse për kryerjen e këtyre punimeve,” tha Bashkia e Vlorës.

Për sa kohë zgjidhja mungon, pavarësisht se janë shpenzuar miliona euro, Vlora mbetet në mëshirë të tymit që del prej mbetjeve që digjen vazhdimisht.

“Gjendja është tej mase kritike. Banorët e Vlorës janë të gjithë të ekspozuar vazhdimisht ndaj një tymi kancerogjen, pa pikë dyshimi,” thotë Ermal Çukani nga lëvizja Community Hub Vlorë.

Sabotimi i turizimit

Biznese dhe aktorë të shoqërisë civile në Vlorë kanë pak besim se situata do të zgjidhet. Mikel Zinxhiria, një prej operatorëve turistikë në qytet, thotë se keqmenaxhimi i mbetjeve dhe djegia e tyre e vazhdueshme i ka dëmtuar dhe shpesh i ka vënë në pozitë të vështirë para turistëve.

“Nuk dinim si t’ua shpjegonim çfarë po ndodhte, pasi situata vazhdoi në më shumë se një javë në gusht dhe smogu dhe tymi mbytën qytetin deri ne Karaburun e Sazan,” thotë ai.

“Ka pas ndikim të lartë në imazhin dhe punën tonë. Pasi këtë vit ishin 2 herë nga më shumë se 1 javë ku qyteti ishte i mbytur në tym dhe erë të keqe,” shtoi ai.

Zinxhira thotë se është pesimist që situata do të rregullohet sa kohë autoritetet lokale nuk kanë ende një plan. Ai vë gjithashtu në dukje se ata si grup interesi nuk dëgjohen dhe takimet bëhen sa për sy e faqe.

“Fakti që s’ka asnjë afat tregon që të paktën dhe vitin tjetër do kemi të njëjtin fat si ky vit. Mbetjet hiqen me metoda primitve, pavarësisht buxhetit të disbursuar për këtë punë,”, thotë Zinxhira.
Edhe Ermal Çukani nuk ka shpresa se kriza do të zgjidhet shpejt, ndërsa thekson se ankesat dhe peticionet e tyre kanë rënë në vesh të shurdhër.

“Situata është tragjike dhe banorët e zonës janë të ekspozuar thuajse çdo ditë ndaj erës dhe tymit. Kemi organizuar një seri peticionesh para një viti që nuk janë dëgjuar. Kemi bërë takime me kryetarin e bashkisë, prefektin, dhe deputetët, por fjala nuk na është dëgjuar. Bashkia e Vlorës, sot që flasim, nuk ka asnjë plan si kjo situatë te ndryshojë,” përfundoi ai./ Reporter.al

Anna Lika dhe Bjordi Mezini do të bëhen prindër! Aktorja, në pritje të ëmbël (FOTO)

Aktorja Anna Lika dhe regjisori Bjordi Mezini do të bëhen prindër për herë të parë.

Anna Lika është shtatzënë, ndërsa gjinia e bebit nuk është zbuluar ende nga çifti.

Ata kanë ndarë lajmin e bukur me fansat, duke postuar disa foto nga festa e organizuar për të njoftuar pritjen e ëmbël.

Anna Lika dhe Bjordi Mezini e zyrtarizuan lidhjen e tyre në vitin 2023, pas u përfolën për gati një vit për romancë mes tyre.

Shtatzënia për Anna Likën vjen disa muaj pasi ajo humbi nënën e saj në moshë të re, në dhjetor të vitit të kaluar.