Day ArchiveBrazili ndalon rrjetin social X, ish-Twitter

Gjykata e Lartë e Brazilit ka urdhëruar pezullimin e menjëhershëm dhe të plotë të rrjetit social “X” në vend.

Në një deklaratë, gjykata tha se do të ndalojë platformën e mediave sociale derisa “X” të pajtohet me të gjitha urdhrat e gjykatës dhe të paguajë gjobat ekzistuese.

Gjyqtari Moraes, i cili ka qenë i përfshirë në një debat të gjatë me X dhe Elon Musk, i kishte dhënë platformës së mediave sociale 24 orë për të emëruar një përfaqësues të ri ligjor ose do të pezullohej, me një afat deri të enjten në mbrëmje.

Platforma pritet të mos jetë e disponueshme në vend brenda 24 orëve të ardhshme. X ka më shumë se 22 milionë përdorues në Brazil, sipas uebsajtit të specializuar DataReportal.

Musk nisi një “sulm” ndaj gjyqtarit Moraes këtë javë, duke e quajtur atë një “diktator” dhe duke e akuzuar atë për mbytje të fjalës së lirë.

“Kush mendon se është?”, u shpreh Musk.

Presidenti brazilian Luiz Inácio Lula da Silva ka reaguar sot lidhur me këto hapa të gjykatës dhe deklaratave të Musk, ku tha se “Çdo qytetar, nga çdo pjesë e botës, nëse ka investime në Brazil, i nënshtrohet Kushtetutës dhe ligjeve braziliane”.

Më 17 gusht, Musk njoftoi se po mbyllte zyrat e X në Brazil, por shërbimi do të mbetet i disponueshëm për përdoruesit.

Gjykatësi nisi një hetim ndaj Musk prillin e kaluar, duke e akuzuar atë për riaktivizimin e llogarive të përdoruesve të bllokuara nga urdhrat e gjykatës braziliane.

Gjykatësi kishte urdhëruar mbylljen e llogarive të njerëzve që i përkisnin lëvizjeve ultrakonservatore, duke pretenduar se ata shpërndanin informacione të rreme.

Në të kaluarën, platforma të tjera si Telegram dhe WhatsApp janë bllokuar përkohësisht në Brazil me urdhër të gjykatës.

Gjashtë arsyet pse mund të ndihesh gjithmonë i/e lodhur

Nëse ndihesh i/e lodhur për pjesën më të madhe të kohës pa ndonjë arsye të dukshme, kjo mund të jetë një shenjë se diçka në stilin tënd të jetesës ose shëndetin tënd nuk është në rregull

Të ndihesh i/e lodhur në mënyrë të vazhdueshme mund të ndikojë në produktivitetin, humorin dhe cilësinë e jetës tënde.

Më poshtë janë 6 arsyet kryesore që mund të fshihen pas kësaj ndjenje të përhershme të lodhjes:

1. Mungesa e gjumit cilësor

Një nga arsyet më të zakonshme për lodhjen e vazhdueshme është mungesa e gjumit cilësor. Edhe nëse fle mjaftueshëm orë, nëse gjumi yt nuk është i thellë dhe i pandërprerë, trupi dhe mendja jote nuk kanë kohë të mjaftueshme për t’u rigjeneruar.

Problemet me gjumin mund të lidhen me shqetësime, stres, ose kushte si apneja e gjumit, që ndikon negativisht në cilësinë e gjumit.

2. Ushqyerja “orar pa orar” dhe e pashëndetshme

Dieta jote luan një rol të rëndësishëm në nivelin tënd të energjisë. Ushqimet e pasura me sheqer dhe karbohidrate mund të shkaktojnë rritje dhe rënie të shpejtë të nivelit të energjisë, duke të lënë ndjesi lodhjeje pas një kohe të shkurtër.

Për më tepër, mungesa e lëndëve ushqyese thelbësore si hekuri, vitaminat B dhe magnezi, mund të çojë në ndjenjën e lodhjes dhe dobësisë trupore.

3. Mungesa e aktivitetit fizik

Edhe pse mund të duket paradoksale, qëndrimi pa aktivitet për periudha të gjata kohore mund të shkaktojë lodhje të madhe. Aktiviteti fizik ndihmon në përmirësimin e qarkullimit të gjakut dhe oksigjenit në trup, duke rritur nivelin e energjisë.

Mungesa e lëvizjes mund të çojë në dobësim të muskujve dhe ngadalësim të metabolizmit, gjë që ndikon negativisht në energjinë tënde ditore.

4. Stresi dhe ankthi

Stresi i vazhdueshëm dhe ankthi janë faktorë kryesorë që mund të ndikojnë në lodhjen tënde. Trupi dhe mendja jote janë në një gjendje të vazhdueshme “alarmi”, duke shpenzuar shumë energji.

Kjo gjendje e vazhdueshme tensioni mund të bëjë që të ndihesh i/e shteruar emocionalisht dhe fizikisht, edhe kur nuk je duke kryer aktivitete të lodhshme.

5. Dehidratimi

Mungesa e ujit në organizëm është shpesh një shkak i nënvlerësuar i lodhjes. Dehidratimi ndikon në mosfunksionimin e duhur të qelizave dhe organeve, duke ngadalësuar procese të rëndësishme të trupit.

Nëse nuk pi ujë mjaftueshëm gjatë ditës, mund të përjetosh ndjenja të vazhdueshme të lodhjes dhe mungesë përqendrimi.

6. Probleme shëndetësore të fshehura

Disa probleme shëndetësore, si anemia, hipotiroidizmi, diabeti, ose çrregullimet e gjëndrave mbiveshkore, mund të jenë shkaktarë të lodhjes kronike. Këto gjendje kërkojnë vëmendje mjekësore dhe trajtim të duhur. Nëse ndihesh vazhdimisht i/e lodhur pavarësisht përpjekjeve për të ndryshuar stilin e jetesës, duhet të kërkosh këshillën e një mjeku për të përjashtuar këto probleme shëndetësore.

Nga Parisi me dashuri… Si Macron po mbyll veshët ndaj kritikave për Vuçiç dhe po shpërblen Serbinë

Presidenti francez Emmanuel Macron dhe homologu i tij serb Aleksandar Vuçiç mbyllën veshët e tyre ndaj zhurmës së jashtme të enjten në mbrëmje për të nënshkruar një sërë marrëveshjesh shumë miliarda euro.

Marrëveshjet u arritën pavarësisht shqetësimeve të sigurisë në lidhje me përqafimin e Beogradit nga Parisi, i cili mban marrëdhënie të ngushta me Moskën dhe Pekinin, dhe protestat e vazhdueshme në shkallë të gjerë në Serbi për zgjerimin e minierave të litiumit.

Dyshja nënshkruan 11 marrëveshje dypalëshe, duke përfshirë një marrëveshje fitimprurëse për 12 avionë luftarakë Rafale të prodhimit francez, shitjen e mineraleve të papërpunuara kritike si litiumi dhe zhvillimin e një programi bërthamor civil për kërkesat në rritje të Serbisë për energji.

“Marrëveshja e nënshkruar sot është historikisht e rëndësishme”, tha Macron. “Unë shoh shumë njerëz të axhetuar me faktin se Serbia ka një marrëdhënie me Rusinë dhe Kinën… por unë respektoj sovranitetin e Serbisë.”

Ai vuri në dukje se Franca kishte marrë garanci të kënaqshme në procesin e negociatave për shitjen e avionëve – me bisedimet që kanë shkuar deri në fund, sipas Vuçiç.

Sipas marrëveshjes së nënshkruar me Dassault Aviation, Serbia do të marrë avionët së bashku me një paketë logjistike shoqëruese dhe pjesë këmbimi me vlerë 2.7 miliardë euro.

“Kjo është një marrëveshje e madhe për ne. Do të kontribuojë në një rritje të konsiderueshme të aftësive operacionale të ushtrisë sonë”, u tha Vuçiç gazetarëve.

Vuçiç, ndërkohë, u përgjigj pyetjeve të gazetarëve francezë në lidhje me marrëdhëniet e tij me Pekinin dhe Moskën.

“Unë nuk do të kërkoj falje për këtë… E di që Emmanuel do të donte që unë të vendosja sanksione kundër Rusisë. Por ne nuk e bëmë dhe nuk na vjen turp për vendimin tonë”.

Gjatë dekadës së tij në pushtet, Vuçiç ka pasur një marrëdhënie të ngushtë me Moskën, veçanërisht me presidentin rus Vladimir Putin, i cili ka vizituar Beogradin dy herë në 10 vitet e fundit.

Vuçiç ka një marrëdhënie të ngushtë edhe me presidentin kinez Xi Jinping, i cili bëri një vizitë speciale në Serbi si pjesë e vizitës së tij të parë në Evropë pas Covid-19. Mediat shtetërore kineze e kanë quajtur marrëdhënien e tyre dypalëshe një “miqësi të hekurt”, një kategori e rezervuar për vendet që Pekini i vlerëson vërtet.

Vizita e Macron vjen gjithashtu pas protestave në shkallë të gjerë kundër një projekti të litiumit të mbështetur nga BE në vend. Kur kancelari gjerman Olaf Scholz, shefi i Marrëveshjes së Gjelbër të BE-së Maroš Šefčovich dhe Vuçiç nënshkruan një marrëveshje që zyrtarizonte mbështetjen e BE-së për minierën muajin e kaluar, një pikë kryesore e shitjes ishte se projekti do ta afronte Serbinë me bllokun.

Por nënshkrimi e ka vënë Vuçiçin në një pikë të vështirë, duke ringjallur një lëvizje masive kundër një miniere që protestuesit pretendojnë se do të dënojë serbët me shfrytëzim ekonomik dhe ndotje të mjedisit dhe do t’i vendosë standardet perëndimore më tej jashtë mundësive. Vuçiç, si kundërpërgjigje, ka akuzuar protestuesit për komplot për ta rrëzuar atë – me mbështetjen e Perëndimit.

Qeveria, e cila udhëhiqet nga Partia Progresive Serbe dhe aleatët e saj politikë, është përpjekur të mbysë pakënaqësinë e përhapur duke synuar organet e pavarura të lajmeve në vend dhe ka pranuar se ka përpiluar ” lista të armiqve të Serbisë” dhe madje ka krijuar lëvizje politike anonime për të mbështetur marrëveshjen për minierën.

Një mik i veçantë
“Franca të do ashtu siç e ke dashur atë!”, tha Macron në vitin 2019 gjatë vizitës së tij të fundit në kryeqytetin serb, ku fjalimet e tij me theks në gjuhën vendase u ndërprenë shpesh nga brohoritjet e zjarrta nga turma e madhe e mbledhur përpara Monumentit të Mirënjohjes për Francën në parkun Kalemegdan të Beogradit.

Përpara vizitës së tij dy-ditore në vend, Macron u dërgoi një letër me 1.400 fjalë gazetave të përditshme serbe, duke u shprehur edhe një herë për “fortësinë dhe vitalitetin e lidhjeve që na bashkojnë ne, francezët dhe serbët” dhe duke thënë se vizita kishte për qëllim “të ushqejë dhe thellojë miqësinë tonë kaq të çmuar”.

“Vizita është padyshim e një rëndësie të madhe për Serbinë,” tha për Politico Boshko Jakshiç, një analist i politikës së jashtme.

“Presidenti Macron ka pranuar të jetë mbrojtësi i Serbisë si një nga liderët kryesorë të Bashkimit Evropian… dhe shpesh ka mbështetur politikat e Vuçiçit, pavarësisht se Vuçiç është subjekt i kritikave nga Bashkimi Evropian për shkak të stilit të tij të lidershipit autokratik.”

Në letrën e tij dhe gjatë fjalimit të tyre të përbashkët të enjten, Macron mori rolin e një kritiku miqësor që përpiqet ta shtyjë butësisht Serbinë në drejtimin e duhur.

“Ne shpesh pajtohemi, por edhe kur nuk pajtohemi, ne gjithmonë e kemi respektuar njëri-tjetrin”, tha Macron në konferencën për shtyp në Pallatin e Serbisë. “Dhe kjo është baza për miqësinë midis dy kombeve tona, e cila u krijua përmes luftës dhe luftimit së bashku për Evropën tonë. Kombet tona kanë qëndruar gjithmonë së bashku.”

Franca dhe Serbia me të vërtetë kanë të përbashkët një marrëdhënie të ngushtë që nga kohërat mesjetare, me mbretërit serbë që martoheshin me fisnikërinë franceze. Lidhja e tyre u thellua gjatë Luftës së Parë Botërore, ndërsa ata luftuan krah për krah në frontin e Selanikut, me Francën që gjithashtu ofroi ndihmë të konsiderueshme humanitare dhe evakuoi civilët dhe trupat serbe, të cilat pësuan viktima masive.

Sot, mbi 80 për qind e investimeve franceze në Ballkan janë në Serbi, ndërsa mbi 100 kompanitë franceze në Serbi punësojnë rreth 12.000 punëtorë.

Vizita e Emmanuel Macron vjen gjithashtu pas protestave në shkallë të gjerë kundër një projekti të litiumit të mbështetur nga BE në vend.
E rëndësishmja, Serbia ka llogaritur që Franca ta mbështesë atë sa herë që është kritikuar nga vende të tjera evropiane. Në maj, Asambleja Parlamentare e Këshillit të Evropës votoi në favor të Kosovës – një ish krahinë jugore e Serbisë që shpalli pavarësinë në vitin 2008, një lëvizje që Beogradi ende nuk e ka njohur – duke u bërë anëtare e organizatës për të drejtat e njeriut.

Franca ishte ndër ato vende që bllokuan votimin përfundimtar të Këshillit të Evropës, duke përmendur përpjekjet joadekuate të Prishtinës për të krijuar një Asociacion të Komunave Serbe, një organ politik që synon të përfaqësojë pakicën serbe të Kosovës.

Për Jakshiçin, Serbia dhe Franca mund të përfitojnë shumë nga aleanca e tyre e rinovuar.

“Interesat franceze janë kryesisht të natyrës ekonomike dhe financiare, ndërsa interesi i presidentit Vuçiç është që edhe një herë të ketë mbulim dhe mbështetje nga Perëndimi për politikat e tij”, tha ai.

Burimi: Politico

Pamjet/ 8 minuta duartrokitje, Angelina Jolie shfaqet e përlotur në premierën e filmit “Maria”

Plot 8 minuta zgjatën duartrokitjet për Angelina Jolie gjatë premierës së filmit “Maria”, ku Jolie luan rolin e sopranos së Operës Maria Callas.

Angelina Jolie u shfaq e emocionuar dhe e përlotur në premierën e filmit të saj në Teatrin Sala Grande, gjatë Festivalit të Filmit në Venecia 2024.

Jolie u përshëndet nga publiku, i cili u ngrit në këmbë dhe e duartrokiti atë për tetë minuta rresht. Disa njerëz postuan video në rrjetet sociale gjatë këtyre ovacioneve, ku fituesja e çmimit Oscar shihej e përlotur.

Para shfaqjes, Jolie foli sesi roli paraqiti sfida dhe vështirësi të ndryshme.

“Ky rol ishte një terapi që nuk e kuptoja se kisha nevojë. Nuk e kisha idenë se sa po mbaja dhe nuk po lëshoja jashtë. Pra, sfida nuk ishte teknike, ishte një përvojë emocionale të gjeja zërin tim, të isha në trupin tim, të shprehesha. Duhet të japësh çdo pjesë të vetes”, u shpreh ajo gjatë një konference shtypi.

 

 

Investitori nga Dubai: Si u pastruan paratë e narkotrafikut në projekte ndërtimi në Tiranë

Në shtator të vitit 2020, Klajdi Merkaj po planifikonte një udhëtim në Dubai për të siguruar financime të bollshme për zgjerimin e biznesit të tij të ndërtimit në Tiranë.

Asokohe vetëm 31 vjeç, Merkaj po ndërtonte përmes kompanisë së themeluar prej tij një kompleks vilash luksoze në Lundër – zonën e pasur të periferisë që rrethon kryeqytetin shqiptar, por ambiciet e tij ishin më të mëdha.

Ndërsa po negocionte për blerjen e dy trojeve të kushtueshme në Tiranë, Merkaj kuptoi se kishte nevojë për më shumë para. Ai iu drejtua për ndihmë Franc Çopjes, një bosi shqiptar të trafikut ndërkombëtar të kokainës, i njohur ndryshe edhe si Franc Gergely.

Merkaj akuzohet se komunikonte me Çopjen përmes aplikacionit Sky ECC dhe e kishte informuar më parë atë për planet e tij të biznesit.

“Për të dy vendet jemi konsumuar lart për t’u realizu. Kemi marrë ok,” e informoi ai Çopjen, ndërsa i kërkoi një kapital prej 1.5 milionë eurosh në cash.

Komunikimet përmes aplikacionit Sky ECC mes Klajdi Merkajt dhe Franc Çopjes janë pjesë e një vendimi voluminoz të Gjykatës së Posaçme për masë sigurie ndaj organizatës kriminale “Çopja”, e akuzuar për një seri vrasjesh me pagesë, trafikimin ndërkombëtar të sasive të mëdha të kokainës si dhe pastrimin e parave me burime kriminale.

Përveç konflikteve të përgjakshme, këto komunikime ekspozojnë gjithashtu disa shembuj të kufizuar të një fenomeni që besohet se është shumë herë më i përhapur mbi pastrimin e parave të narkotrafikut në kullat dhe komplekset e ndërtimit në Tiranë.

Dubai në Emiratet e Bashkuara Arabe njihet si “parajsë penale” për një sërë figurash të krimit të organizuar shqiptar, të cilët u fshehën atje për t’u shpëtuar arrestimeve apo atentateve nga grupet rivale.

Franc Çopja besohet se qëndroi në Dubai nga viti 2020 deri në dhjetor 2023, kur u ekstradua në Belgjikë si urdhërues i një vrasjeje për “prishjen e pazareve të drogës”.

Hetuesit besojnë se ai dirigjoi nga Dubai një ushtri me njerëz për të pastruar paratë e tij në Shqipëri si dhe negocioi marrëveshje biznesi që e bënin atë një investitor të fshehtë në projektet e ndërtimit në Tiranë.

Gjatë vitit 2020, kohë së cilës i përkasin bisedat e zhvilluara në SKY ECC, Çopja dokumentohet të ketë sjellë në Shqipëri të paktën 7.5 milionë euro të thata, të cilat u investuan në ndërtimin e një pallati pranë Qendrës Spitalore Universitare “Nënë Tereza”, në blerjen e apartamenteve të shtrenjta në disa prej kullave të Tiranës si dhe dy vilave në kompleksin “Mandarine Drive” pas qendrës tregtare TEG, e ndërtuar nga kompania e themeluar nga Merkaj.

Një sasi më e madhe prej 15.4 milionë eurosh dyshohet që të jetë investuar një vit më vonë në blerjen e lingotave të arit nga Çopja.

Sipas Europol, agjencisë ligjzbatuese të Bashkimit Europian që koordinoi operacionin e goditjes së grupit Çopja në fund të korrikut, kjo organizatë përdorte transaksione komplekse për të pastruar paratë e gjeneruara nga aktivitetet e paligjshme.

“Mes të arrestuarve është edhe një pastrues parash me qendër në Tiranë, i cili u ofronte shërbimet e tij disa grupeve të tjera kriminale të nivelit të lartë, të angazhuar në nivel ndërkombëtar në vrasje, korrupsion dhe trafik droge në shkallë të gjerë,” deklaroi Interpoli.

Masa e arrestit për akuzën e pastrimit të parave ndaj Klajdi Merkajt nuk është ekzekutuar ende dhe ai është shpallur në kërkim. I kontaktuar nga BIRN, vëllai i tij  Endri Merkaj, i cili zotëron kompaninë e ndërtimit, nuk iu përgjigj një kërkese për koment deri në publikimin e këtij shkrimi.

“Ka nevojë për oksigjen”  

Organizata kriminale e drejtuar nga vëllezërit nga Elbasani, Franc Çopja, 32 vjeç dhe Hajdar Çopja, 40 vjeç, u godit në fund të korrikut nga Prokuroria e Posaçme, SPAK, në bashkëpunim me Europol dhe autoritetet ligjzbatuese në Belgjikë, Holandë dhe Francë.

Operacioni ndërkombëtar u kodua me emrin “Gorgon”, figura monstruoze të mitologjisë greke me Meduzën si përfaqësuesen më të njohur të tyre.

Sipas vendimit gjyqësor që BIRN e disponon, organizata Çopja akuzohet se mes viteve 2018-2020 kreu vrasjen e shtatë personave dhe plagosjen e dy të tjerëve, ndërsa përpiqej të eleminonte grupin kundërshtar Alibej përmes kontraktimit të vrasësve me pagesë.

Organizata besohet se e ka origjinën në vitet 2006-2007 në Itali, ku vëllezërit Çopja e nisën aktivitetin e tyre kriminal si shpërndarës të dozave të vogla të kokainës,

“Me kalimin e viteve, vëllezërit Çopja u fuqizuan shumë nga shitja dhe trafikimi i drogës, ku nga Italia e shtrinë aktivitetin e tyre kriminal edhe në vende të tjera të Europës, kryesisht në Holandë, Belgjikë dhe Mbretërinë e Bashkuar,” thuhet në vendim.

Në vitin 2020, organizata shtrihej në disa vende të Bashkimit Europian dhe kultivonte lidhje me grosistët e kokainës në Amerikën Latine. Hetuesit besojnë se grupi Çopja ka trafikuar drogë edhe në vende aziatike si India dhe Singapori apo në Afrikën e Jugut.

Ndërsa luftonin për hakmarrje dhe trafikonin sasi të konsiderueshme kokaine në tregun ndërkombëtar, grupi Çopja ishte gjithashtu në kërkim të mundësive për të pastruar paratë e fituara përmes aktiviteteve të paligjshme në Shqipëri.

Nga 7.5 milionë euro të dokumentuara në vitin 2020, tre milionë prej tyre dyshohet se u injektuan në kompaninë “Elba Beton” në pronësinë e Arjan Ormenajt për të realizuar ndërtimin e një pallati pranë qendrës spitalore universitare “Nënë Tereza” në Tiranë.

“Elba Beton” është një kompani e themeluar në vitin 2001 nga Arben Lamçja, 50 vjeç – i dënuar në Itali për shfrytëzim prostitucioni në fund të viteve ’90 dhe njeri i besuar i Franc Çopjes në administrimin dhe pastrimin e parave. Në vitin 2006, Lamçja ia shiti kompaninë Arjan Ormenajt, por hetuesit besojnë se ai vazhdoi të qëndronte si ortak në hije i saj.

Ormenaj është aksioner edhe në gjashtë kompani të tjera biznesi, mes të cilave edhe “Trans Cement” sh.p.k. “Elba Beton” së bashku me kompaninë simotër “Trans Cement” zhvilluan projekte ndërtimi në plazhin e Golemit dhe në Tiranë mes viteve 2021-2023.

Sipas vendimit të gjykatës, Arben Lamçja dhe Arjan Ormenaj kanë kryer veprime aktive për llogari të krerëve të organizatës Çopja nëpërmjet blerjes së pasurive të paluajtshme, financimit të ndërtimit të godinave të banimit dhe çeljes së operatorëve ekonomikë me qëllim mosekspozimin e tyre si posedues dhe pronarë de facto.

Në një rast, Lamçja i shkruan Çopjes në janar 2020 se Ormenaj po planifikonte të ndërtonte një pallat pranë spitalit nr.5 dhe i kishte kërkuar ta pyeste Francin nëse donte të futej si investitor me një vlerë prej 2 milionë eurosh.

Çopja i përgjigjet se nuk është problem për lekët. “Arjan Ormenaj e ka derën të hapur pa kohë dhe pa shifër,” citohet të shkruajë ai.

Dhjetë muaj më vonë, Lamçja e njofton sërish Çopjen se Ormenaj “ka nevojë për oksigjen”.

Në të njëjtën kohë, sipas vendimit të gjykatës, Lamçja dhe Ormenaj blinin apartamente për llogari të Çopjes dhe i regjistronin ato në emrat e të afërmve apo rrethit të tij shoqëror.

Arrestimi i Ormenajt nuk u bë i mundur gjatë operacionit, duke u shpallur në kërkim për veprën penale të pastrimit të parave, ndërsa Arben Lamçja u arrestua në Kosovë në fillim të gushtit dhe u ekstradua në Shqipëri.

Ormenaj ishte i paarritshëm për koment, ndërsa avokati i Arben Lamçjes, Altin Gjata nuk i komentoi akuzat, pasi tha se duhet të njihet me të gjitha provat e Prokurorisë.

Por ai i tha BIRN se Lamçja i ishte nënshtruar më parë hetimit pasuror nga Krimet e Rënda dhe çështja kundër tij ishte pushuar.

Nga biznesi i gomave në ndërtim   

“Mandarine Drive” është një kompeks vilash luksoze në periferi të Tiranës, i ndërtuar në një kodër të butë, dikur të gjelbëruar pas qendrës tregtare TEG. Vilat i përkasin arkitekturës moderne, kanë secila pishina personale dhe listohen nga agjencitë imobilare me çmime shitjeje që variojnë nga 1 milion deri në 1.5 milionë euro secila.

Kompleksi “Mandarine Drive” është një investim i kompanisë Merkaj 3 sh.p.k, e themeluar në vitin 2013 nga Klajdi Merkaj kur ishte vetëm 24-vjeç, me aktivitet tregtinë e gomave për mjetet e rënda të transportit. Në vitin 2017, Merkaj ia shiti aksionet vëllait të tij dhe kompania shënoi një ngjitje të beftë, duke u përfshirë në projektin e ndërtimit të kompleksit të vilave “Mandarine Drive”.

Megjithatë, të dhënat e siguruara nga vendimi i Gjykatës së Posaçme sugjerojnë se Klajdi Merkaj vazhdoi të kryente veprime për llogari të kompanisë.

Komunikimet në aplikacionin Sky ECC me Franc Çopjen e identifikojnë Merkajn si një person të angazhuar në transferta parash nga Mbretëria e Bashkuar drejt Shqipërisë. Në disa raste gjatë vitit 2020, ai i dërgon Çopjes kode postare, që sipas burimeve të hapura rezultojnë të jenë shtëpi në Londër, Luton dhe në periferi të Birmingamit.

Ai kujdeset gjithashtu që të shesë makinat e Çopjes si dhe të fshehë pronësinë e dy vilave të tyre në kompleksin “Mandarine Drive”.

“Shtetasi Klajdi Merkaj evidentohet si një nga personat e besuar që mban dhe menaxhon vlera monetare të konsiderueshme cash për llogari të shtetasit Franc Gergely,” thuhet në vendimin e gjykatës.

“… sipas porosisë dhe orientimit të shtetasit Franc Gergely (Çopja), ka marrë dhe ka transportuar vlera monetare cash, të cilat më pas janë investuar në ndërtim dhe blerjen e pasurive të patundshme për llogari të shtetasit Franc Gergely,” shtohet aty.

Parkimi i parave

Përveç sipërmarrësve të ndërtimit, Franc Çopja përdori edhe persona të tjerë për operacionet e tij të pastrimit të parave në Shqipëri.

Dy prej tyre dyshohet se ishin pronarët e një pike të këmbimit valutor “B.Lika, Çimi & Keni” përballë Bankës së Shqipërisë, Bashkim Lika dhe Maklen Mici, të cilët akuzohen se e përdornin biznesin e tyre si bazë financiare për organizatën kriminale Çopja.

Prokuroria e akuzon Micin se si përdorues i pikës së këmbimit valutor ka mbajtur në një rast në këto ambiente 2.3 milionë euro, të cilat i përkisnin Franc Çopjes dhe një pjesë e të cilave janë tërhequr nga Arben Lamçja.

Në një rast të dytë, Dorjan Dyli me profesion farmacist ka marrë pranë pikës së këmbimit valutor shumën prej 121 mijë eurosh, që i ka përdorur si këst të parë për blerjen e një apartamenti në një godinë përballë Fakultetit Ekonomik, i cili identifikohet si “pallati me fasadë të kuqe” në dosje. Ai i ka tërhequr paratë duke u identifikuar me emrin e koduar “shoku i Valkanit”.

Apartamenti kushtonte në total 236 mijë euro, por pjesën tjetër Dyli e ka mbuluar me një kredi fiktive të marrë në bankë, të cilën e ka shlyer me paratë e dërguara nga Çopja dhe që qëndronin në pikën e këmbimit valutor të Micit.

Në njërën nga bisedat që ndodhet në vendimin e gjykatës, Dyli i shpjegoi Çopjes se “drejtori i bankës e kishte këshilluar që kalimi i pagesave të bëhej çdo 5-6 ditë me shuma monetare 7 mijë deri në 10 mijë euro, pasi kur bëhen derdhjet cash nuk gjurmohen dot, vetëm se kanë komisione të larta”.

Franc Çopja shfaqet veçanërisht i interesuar për të blerë flori të pastër 24 karatësh në janar të vitit 2021 dhe personi që kujdesej për sigurimin e arit ishte kambisti Mici.

Në një rast, Mici akuzohet se i ka siguruar Çopjes 10 kilogramë flori të pastër, por bosi i organizatës i ka kërkuar që t’i sigurojë edhe 30 kilogramë të tjerë, të cilët rezultojnë të jenë sjellë në Shqipëri.

Në komunikimet mes tyre, hetuesit thonë se kanë gjetur edhe foto të lingotave të arit me vlerë 15.4 milionë euro. Sipas vendimit, Mici i kishte siguruar lingotat e arit me vlerë 15.4 milionë euro për llogari të Franc Çopjes.

Lika dhe Mici u arrestuan gjatë operacionit në fund të korrikut me akuzën e pastrimit të produkteve të veprës penale, por avokati i tyre, Adriatik Kuka i tha BIRN se ata nuk i lidh asgjë me veprimtarinë kriminale që iu atribuohet dhe se “janë të tronditur nga akuzat”.

Kuka tha gjithashtu se klientët e tij janë taksapagues të rregullt, tregtarë të njohur në qytetin e Tiranës dhe praktikantë të fesë myslimane.

“Duke qenë se janë praktikantë të fesë myslimane, për shkak të fesë nuk i lidh asnjë gjë me veprimtaritë kriminale. Si rrjedhim, nuk mund të shkelin normat ligjore/njerëzore që vijnë në kundërshtim me të drejtat e njeriut dhe ligjeve në fuqi,” përfundoi Kuka./Reporter.al

Administrimi i pallateve, Autoriteti i Konkurrencës “kërcënon” Arlis me një gjobë të dytë 480 euro

Autoriteti i Konkurrencës i ka kërkuar ndërmarrjes Arlis Administrim dhënien e informacioneve të nevojshme për hetimin në tregun e ofrimit dhe aksesit të shërbimit të internetit në pallate, duke e kërcënuar me një gjobë të dytë, pas asaj të vendosur në muajin qershor.

Komisioni i Konkurrencës i ka kërkuar ndërmarrjes Arlis Administrim të depozitojë pranë Autoritetit të Konkurrencës informacion për komplekset e pallateve që administron ose ka administruar për periudhën 01 janar 2020 deri në 10 maj 2024, duke specifikuar emrin e tyre, adresat e sakta dhe numrin e hyrjeve që ka secili.

Gjithashtu, ndërmarrja duhet t’i përgjigjet pyetjes “Në komplekset e pallateve që ju administroni, cila ndërmarrje ka ndërtuar rrjetin për shërbimin e internetit, deri në pikën e aksesit në infrastrukturë fizike në godinat e banimit?”

Arlis duhet gjithashtu të vendosë në dispozicion kontratat e lidhura me operatorët që ofrojnë shërbimin e internetit përperiudhën 01 janar 2020 deri në 10 maj 2024.

Në rast të mospërmbushjes së detyrimeve të mësipërme, ndërmarrja Arlis Administrim do të ndëshkohet me gjobë në masën jo më shumë se 1% të xhiros totale të vitit paraardhës financiar, për shkelje të lehtë të konkurrencës në zbatim të nenit 73, pika 1, gërma (a) të Ligiit nr. 9121/2003.

Në muajin qershor, Autoriteti i Konkurrencës e gjobiti kompaninë Arlis Administrim në shumën e 48 mijë lekëve, për refuzim të refuzimin e pranimit të inspektimit të këtij institucioni.

Komisioni i Konkurrencës në muajin maj të këtij viti mori vendimin për hapjen e procedurës së hetimit të thelluar në tregun e ofrimit dhe aksesit të shërbimit të internetit ndaj ndërmarrjeve të administrimit dhe ndërmarrjeve të internetit në rezidencat e banimit që këto ndërmarrje ushtrojnë veprimtarinë, për periudhën kohore nga 1 janar 2020 deri në 10 maj 2024.

Gjatë procedurave hetimore është konstatuar se sjellja e ndëmarrjes Arlis Administrim, mund të përbëjë abuzim me pozitën dominuese, duke refuzuar aksesin ndërmarrjeve të tjera që ofrojnë shërbimin e internetit në rezidencat e banimit ku kjo ndërmarrje operon.

Por, gjatë inspektimit në ndërmarrjen Arlis Administrim, inspektorët e Sekretariatit të autorizuar me shkrim nga Komisioni për kryerjen e inspektimeve, u refuzuan për dhënien e çdo lloj informacioni që lidhej me objektin dhe qëllimin e inspektimit.

Sipas ligjit “Për mbrojtjen e konkurrencës”, Komisioni i Konkurrencës vendos gjoba, në masën jo më shumë se 1% të xhiros totale të vitit paraardhës financiar, mbi ndërmarrjet ose grupimet e ndërmarrjeve nëse ato refuzojnë të pranojnë inspektimet në mbështetje të vendimit të marrë, ose refuzojnë t’u përgjigjen pyetjeve për faktet dhe japin përgjigje të pasakta, të paplota, të rreme ose pengojnë inspektimin.

Mbi këtë bazë, Komisioni i Konkurrencës vendosi gjobitjen e ndërmarrjes Arlis Administrim SHPK për shkelje të lehtë të konkurrencës, në masën 48,392 lekë.

Autoriteti i Konkurrencës vlerëson se në rezidencat e banimit në Tiranë, ndërmarrjet e administrimit menaxhojnë infrastrukturën e shërbimit të internetit. Për më tepër, këto ndërmarrje bëjnë lidhjet me kompanitë e ofrimit të shërbimit të internetit dhe banorëve të cilët duan të përfitojnë këtë shërbim. Në të tilla kushte, ndërmarrjet e administrimit kanë ndikim në tregun e ofrimit të shërbimit të internetit në rezidencat ku ata operojnë.

Nga informacioni i administruar nga ndërmarrjet që ofrojnë shërbimin e internetit, është evidentuar se ekzistojnë problematika për kufizimin e aksesit nga ndërmarrje të tjera të administrimit në rezidencat e banimit në qarkun e Tiranës.

Nga hetimi paraprak, janë evidentuar raste tipike të abuzimit me pozitën dominuese përkatëse nga disa shoqëri administrimi. Abuzimet përfshijnë mosdhënien e aksesit në mjediset e përbashkëta për operatorët e interesuar, apo aplikimi i kushteve dhe tarifave të ndryshme, për operatorë të ndryshëm. Disa kompani të ofrimit të shërbimit të internetit në procedurën hetimore janë shprehur se nuk lejohen të vendosin infrastrukturën e tyre dhe të ofrojnë shërbim në disa rezidenca banimi.

Duke u nisur edhe nga fakti se disa nga ndërmarrjet e administrimit kanë aksionarë të përbashkët me kompanitë e shërbimit të internetit e internetit, ushtrojnë veprimtarinë në të njëjtën rezidencë banimi, duke sjellë kështu një integrim vertikal, për Autoritetin e Konkurrencës ngrihen dyshime që në tregun e ofrimit dhe aksesit të shërbimit të internetit mund të këtë shkelje të ligjit “Për mbrojtjen e Konkurrencës”.

Foto/ Në pritje të ëmbël, moderatorja shqiptare na prezanton për herë të parë me partnerin e saj

Një surprizë sapo ka ardhur nga moderatorja, Liesa Haxhiasllani. Pak momente më herët ajo ka ndarë në rrjete sociale një postim, “birthday dump” teksa shfaqet me barkun e rrumbullakosur por vëmendjen e gjithë ndjekësve të saj e mori një tjetër detaj.

Ditën e sotme Liesa bëri publik për herë të parë partnerin e saj, Branko Duka.

Branko Duka nuk është një emër i njohur për botën e showbiz-it, ndërsa gjatë intervistave të zhvilluara më herët nga Liesa, ajo ka bërë publik vetëm emrin e tij dhe shenjën e horoskopit, Ujor! Po ashtu dyshja është në pritje të fëmijës së tyre të parë.

Protesta në Thumanë-Kashar/ Banorët kallëzojnë në SPAK Belinda Ballukun

Banorët e Thumanës, Krujës, Fushë-Krujës dhe fshatrave përreth kanë kallëzuar në SPAK për akuzat e ‘Shpërdorimit të Detyrës’, ‘Korrupsionit’, ‘Shkeljes së Barazisë në Tendera’, ‘Falsifikimit të Dokumentave’ zv.kryeministren Belinda Ballukun, Ministrinë e Energjisë dhe Infrastrukturës, ARRSH dhe të gjithë institucionet që kanë marrë pjesë në tenderin e autostradës Thumanë-Kashar.

Dokumenti është firmosur nga të gjithë protestuesit dhe do të dorëzohet SPAK që të hetojë shkeljet që janë bërë në tenderin e rrugës Thumanë-Kashar.
Me qindra banorë të Krujës, Fushë Krujës, Thumanës, Milotit, Kurbinit kanë dalë sërish në protestë për të dhjetën herë radhazi, duke bllokuar autostradën Thumanë-Kashar, pasi kërkojnë që të kenë të drejtën për hyrje-dalje në këtë aks të rëndësishëm kombëtar.

Banorët bëjnë përgjegjës kryeministrin Edi Rama, pas nuk po u jep zgjidhje problemit të tyre, por si përgjigje i dërgon qindra efektivë të Policisë së Shtetit për t’i detyruar të përfundojnë protestën.

‘Janë qindra biznese që janë bllokuar. Protesta nuk do ndalohet asnjëherë’, shprehet një prej protestuesve.

Liga e Kombeve/ Silvinjo lë jashtë Kombëtares Uzunin dhe Muçin

Përgatitjet për dy ndeshjet e para në Grupin B1 do të nisin të hënë më 2 shtator, teksa trajneri Silvinjo ka publikuar listën me 24 lojtarë të grumbulluar.

Në portë janë Thomas Strakosha, Alen Sherri dhe Simon Simoni. Në mbrojtje rikthehet futbollisti i Partizanit, Andi Hadroj. Emrat e tjerë që përbëjnë repartin e prapavijës janë Berat Gjimshiti, Elseid Hysaj, Ivan Balliu, Mario Mitaj, Marash Kumbulla, Ardian Ismajli dhe Enea Mihaj.

Në mesfushë dhe sulm Silvinjo ka vendosur të thërrasë për herë të parë në Kombëtaren A mesfushorin Sebastjan Spahiun dhe sulmuesin Agim Zeka. Të dy futbollistët më parë kanë qenë pjesë e Shqipërisë U-21. Spahiu aktivizohet në Iran, ndërsa Zeka në kampionatin “Abissnet Superiore” me Partizanin. Pjesa tjetër e lojtarëve që përbëjnë repartin e mesfushës dhe të sulmit janë Ylber Ramadani, Amir Abrashi, Kristjan Asllani, Medon Berisha, Qazim Laçi, Nedim Bajrami, Arbër Hoxha, Jasir Asani, Rey Manaj, Armando Broja dhe Taulant Seferi.

Në listën e Silvinjos bien në sy mungesa të rëndësishme, si ajo e Ernest Muçit, Myrto Uzunit, Keidi Bares dhe Etrit Berishës. Nëse mungesa e portierit është deri diku e justifikuar, pasi ende nuk ka gjetur skuadrën e së ardhmes, për Muçin që luan te Beshiktashi dhe Uzunin te Granada, trajneri duket aktualisht nuk i ka pjesë të projektit. Duket luks i madh që edhe Keidi Bare i transferuar te Zaragoza, Indrit Tuci që po shkëlqen te Sparta e Pragës, apo Anis Mehmeti që luan te Bristol Siti, të mos jenë pjesë e skuadrës në një kompeticion si Liga e Kombeve që renditet i treti për nga rëndësia.

Mungesa të rëndësishme janë edhe Mirlind Daku, i pezulluar nga UEFA gjatë europianit si dhe Arlind Ajeti i dëmtuar.

Grumbullimi i lojtarëve do të nisë që të dielën në Tiranë, ndërsa grupi i lojtarëve pritet të jetë i plotë të hënën më 2 shtator. Seancat stërvitore do të zhvillohen në “Shtëpinë e Futbollit”, ndërsa të premten kuqezinjtë do të udhëtojnë drejt Çekisë, aty ky më 7 shtator do të luhet ndeshja e parë në Grupin B1 të Ligës së Kombeve ndaj Ukrainës, në stadiumin “Epet Arena”, në orën 20:45. Tre ditë më pas më 10 shtator, Kombëtarja shqiptare do të luajë ndaj Gjeorgjisë në stadiumin “Air Albania”, në orën 20:45.

 

Rrëzohet helikopteri zjarrfikës në Portugali, disa viktima e të zhdukur

Të paktën dy persona kanë vdekur dhe tre të tjerë janë të zhdukur pasi një helikopter që po kthehej nga një mision zjarrfikës u rrëzua në lumin Douro në Portugalinë veriore, thanë autoritetet lokale.

Piloti i helikopterit u shpëtua nga një varkë turistike që lundronte pranë vendit të rrëzimit, në zonën e Lamegos. Ai ka thyer këmbët dhe është dërguar në spital.

Përveç pilotit, helikopteri mbante një ekip prej pesë anëtarësh specialistësh nga Njësia Portugeze e Mbrojtjes dhe Ndihmës. Të dy u gjetën të vdekur dhe tre të tjerët janë të zhdukur, tha Silva Lambreia, komandantja e Autoritetit Portual të lumit Douro.

“Ne kemi filluar kërkimet nënujore dhe në brigje”, u tha ajo gazetarëve, teksa shkaqet e aksidentit mbeten të paqarta.

Kryeministri Luiz Montenegro shkoi në vendin e rrëzimit, ku janë vendosur dhjetëra shpëtimtarë, zhytës, policë dhe dy helikopterë të Forcave Ajrore.