Day ArchiveVrasësit nga Nikla, si dështoi plani 500.000 euro për të vrarë Ardian Nikulajn në 2021

Atentati i bujshëm ndaj biznesmenit Ardian Nikulaj në Shëngjin të Lezhës vitin e kaluar, ka pas një financim të konsiderueshëm parash të ardhura nga aktivitetet e paligjshme të organizatës kriminale që e porositi për gjakmarrje, në Britaninë e Madhe.

Bëhet fjalë kryesisht për aktivitet droge, zhvatje të klientëve dhe prostitucion, në qytetin e Brimingham dhe tashmë ka një dosje angleze për rastin.

Aty theksohet se Nikulaj u vra me para të përfituara nga prostitucioni dhe vjedhja e parave nga kartat e bankës të klientëve në një lokal nate. Përpjekjet për të eleminuar Ardian Nikulajn datojnë dy vite përpara datës 19 Prill 2023, kur ai të vritej, sipas raportimit të TCH.

Informacionet e mbledhura deri më tani nga agjencitë ligj-zbatuese shqiptare, tregojnë se ky grup kriminal shqiptarë në Angli, me një potencial financiar të lartë, u vu në kontakt me njerëz të botës në Nikël në vitin 2021. Ata vunë në dispozicion 500.000 euro për një vrasës me pagesë i cili duhet të merrte përsipër vrasjen e Ardian Nikulajt.

Njeriu i botës së krimit në Nikël, tashmë i kërkuar nga SPAK, u tha se nuk mund ta merrte përsipër këtë porosi të mirë-paguar, pasi shënjestra Ardian Nikulaj ishte tejet e vështirë për ta ekzekutuar. Një prej anëtarëve të bandës së killerave në Nikël i çon fjalë Nikulajt për ofertën e bërë për kokën e tij.

Kjo bëri që biznesmeni Nikulaj të shtonte masat e sigurisë kur lëvizte nga një destinacion në tjetrin por jo brenda hotelit ku qëndronte pjesën më të madhe të kohës. Në të tilla kushte kur asnjë vrasës me pagesë në Shqipëri nuk e merrte përsipër ekzekutimin e Ardianit, porositësit e vrasjes nuk hoqën dorë për t’i shkuar deri në fund planit. E mirëmenduan planin e ri, duke përfshirë shtetas jo shqiptarë.

Fillimisht siguruan në Angli ekzekutorin. Ai ishte portugezi me vendbanimin në Londër Ruben Saraiva me lidhje në botën e krimit të atjeshëm. Më pas rekrutuan katër britanikët Thomas Mithan, Steven Hunt, Harry Simpson dhe Harriet Bridgerman të cilët u sollën në Shëngjin me detyra të përcaktuara, mbajtën nën survejim të shënjestrës në hotelin pronë e tija.

Ditën e vrasjes siç shihet nga këto pamje, Harry Simpson luan bilardo dhe ushqehet bashkë djalin e Ardianit duke mos e ditur se ai përmes gjesteve njoftoi Ruben Saraivën të hynte në hotel e ia vrarë babanë. Në dosjen e prokurorisë së Lezhës, është faktuar me prova se ky plan kishte si organizator në terren Edmond Haxhinë, që nga blerja e motorit në Tiranë ku ai ishte bashkë me ish të fejuarën dhe Ruben Saraivën.

Sikurse në largimin me një automjet Volsvagen Golf të Saraivës në drejtim të Kapshticës. Të martën e 30 korrikut një gjykatë në Londër do të vendosë nëse Edmond Haxhia dhe katër britanikët, që të gjithë të arrestuar në shtetin ishull, do të ekstradohen nga Anglia për tu përballuar me akuzat për vrasje në Shqipëri.

Ish-banorja e BBVA fejohet me reperin italian?

Modelja Jori Delli, prej disa muajsh ka bërë publike lidhjen me reperin italian, Fred De Palma, me të cilin tashmë ajo ka nisur të planifikojë martesën e zgjerimin e familjes.

Në një intervistë të dhënë së fundmi, Jori i ka dhënën fund aludimeve se ajo dhe reperi janë fejuar në fshehtësi.

“Nuk kam asnjë unazë. Nuk jemi fejuar në fshehtësi. Jo unë kur të kem unazë do tregoj, nuk e fsheh fare”, tha ajo.

Ndër të tjera, Jori ka treguar se ajo dhe Fred De Palma kanë diskutuar edhe planet për martesë e fëmijë, madje kanë gjetur edhe emrin e vajzës.

Pyetje: Keni diskutuar për martesë, për fëmijë?

“Po po, flasim, kemi një emër për gocë. Nuk e them se mos ma kopjojnë”, tha Jori.

Po ashtu modelja e njohur ka rrëfyer edhe njohjen me reperin. Ajo ka treguar në “Pushime on Top” se me Fred De Palmën janë njohur 7 vite më parë, në një kohë kur ajo ishte e dashuruar dhe në një lidhje me një tjetër person.

“Ne kemi 7 vite që jemi njohur, nuk e ka thënë asnjëherë publikisht, por unë kama qenë e lidhur atëherë me një ish-in tim, Simonen. Kemi qenë në një klub, ka qenë edhe Fredi atje, dhe në një moment kur po kaloja vetëm, ai thotë “kush është ajo”, pyet dhe pronarin për mua. Bënte pak si garip, dhe ai pronari i tha “është e dashura e shokut tim”, e kishte edhe shok Simonen ai.

Janë zënë, është bërë një çështje… Të nesërmen i kërkon dhe falje atij, i thotë; nuk e dija që ishte e dashura jote”, mua pastaj më shkruan pas kohësh, unë i jam përgjigjur shumë keq, se s’më pëlqente ai si arrogant. Pas 3 vitesh, agjencia ime në Milano më thotë për një videoklip, ishte për Fred De Palmën.

Ai ka qenë i dashuruar në atë periudhë dhe unë kam qenë e lidhur, por si profesionalistë kemi bërë videoklipin dhe kaq. Para dy vitesh, kur isha single, më shkruan në Instagram dhe unë iu përgjigja. Isha e mërzitur dhe folëm, zbulova një anë tjetër të tij. Jemi të dashuruar shumë”, tregoi ajo.

Fitorja e të majtëve, Franca rrezikon të kthehet në epokën e pas Luftës së Dytë Botërore

“Fitorja jonë vetëm shtyhet.”

Marine Le Pen u tregua e guximshme për humbjen e partisë së saj të ekstremit të djathtë ‘Tubimi Kombëtar’(RN) në zgjedhjet parlamentare të Francës të dielën.

Në realitet, vendi i tretë, sipas rezultateve të përkohshme, është një zhgënjim i hidhur.

Partia mendoi se më në fund do të kishte mundësinë t’i tregonte popullit francez se mund të qeveriste, duke i dhënë partisë një trampolinë për zgjedhjet më të rëndësishme presidenciale të vitit 2027. Por votuesit francezë i ndaluan.

Një arsye ishte se RN-ja rezultoi se nuk ishte aq e detoksifikuar, duke paraqitur kandidatë me prejardhje ekstremiste ose me një histori deklaratash raciste dhe antisemitike.

Por më e rëndësishmja, i ashtuquajturi front republikan i Francës – gatishmëria e partive të saj centriste dhe të majta për të bashkuar forcat për të penguar ngritjen e së djathtës ekstreme në pushtet – u tregua elastike.

RN e përshkruan këtë si një lojë cinike nga establishmenti politik për ta mbyllur atë nga pushteti. Votuesit, megjithatë, u bashkuan me të.

Vetëm kjo do t’i lejojë Presidentit Emmanuel Macron të argumentojë se bixhozi i tij zgjedhor (aleatët e tij preferojnë ta quajnë atë një strategji racionale të denjë për Descartes-in) në fund dha rezultat.

Ai mund të thotë se theu ethet populiste që mbërthyen vendin, duke ndërprerë ngritjen në dukje të paepur të së djathtës ekstreme. Për më tepër, aleanca e tij ansamble e partive centriste ka performuar dukshëm më mirë se sa pritej, duke u renditur në një vend të dytë të fortë.

Kjo i mban centristët në lojën politike kur në një fazë dukej se po shkonin drejt një shkatërrimi. Megjithatë, Macron donte që zgjedhjet e parakohshme me një fushatë të rrufeshme tre-javore të ishin një moment “sqarimi” politik për Francën.

Vendi tani përballet me muaj, ndoshta vite, të pasigurisë politike dhe qeverisjes së paqëndrueshme. Ky në vetvete është një lajm i keq për Francën dhe partnerët e saj evropianë. Franca duket se po e kthen orën pas në Republikën e 4-të, periudha e paqëndrueshme politikisht e pasluftës kur presidenca ishte më e dobët dhe një parlament i zhurmshëm ishte suprem.

Në javët e fundit, energjia është larguar nga pallati Elysee në Asamblenë Kombëtare.

Për më tepër, votimi i së dielës ishte mbi të gjitha një fitore për partinë e majtë Nouveau Front Populaire, e formuar në katër ditë pas një programi radikal të taksave dhe shpenzimeve pas shpërbërjes shokuese të parlamentit nga Macron.

Ishte e majta ajo që udhëhoqi një pakt elektoral për të penguar të djathtën ekstreme, e cila shpëtoi shumë vende për centristët.

Pas raundit të parë, ajo tërhoqi me shpejtësi kandidatët e saj të vendit të tretë nga garat trepalëshe në vendet në të gjithë vendin për të parandaluar një ndarje në votën kundër RN, ndërkohë që liderët e aleancës së Macron paraprinë (edhe pse kandidatët e tyre kryesisht e ndoqën shembullin).

Si blloku më i madh, NFP( Fronti i ri Popullor)do të pretendojë për postin e kryeministrit dhe të drejtën për të formuar një qeveri. Kjo do të mjaftojë për të nervozuar tregjet, duke pasur parasysh rritjen e planifikuar masive të shpenzimeve të financuara, teorikisht, nga rritja e taksave ndaj të pasurve.

Jean-Luc Mélenchon, lideri luftarak i ekstremit të majtë La France Insoumise, më i madhi nga katër partitë në NFP, tha se nuk mund të kishte kompromis për programin e së majtës.

Por NFP nuk do të ketë një shumicë qeverisëse. Kampi i Macron shpreson që e majta përfundimisht do të copëtohet nën tendosjen e mospërputhjes së Melénchon dhe se më pas mund të përpiqet të mbledhë një lloj koalicioni me socialistët, të gjelbërt dhe të moderuarit e tjerë. Kjo mund të zgjasë javë nëse jo muaj. Edhe nëse numrat mblidhen dhe duket një shtrirje, qendra e majtë ka të ngjarë të kërkojë një çmim të lartë – të tillë si kthimi i rritjes së Macron në moshën e pensionit nga 62 në 64 vjeç ose rivendosja e një takse mbi pasurinë mbi aktivet financiare.

Nëse nuk ka rrugë për një shumicë, Macron mund të duhet të vendosë një kryeministër të përkohshëm me një mandat minimal derisa zgjedhjet e reja të mund të thirren brenda një viti.

Me tre blloqe politike pak a shumë të barabarta që nuk dëshirojnë të punojnë me njëri-tjetrin, Franca duket e paqeverisshme. Gjatë gjithë trazirave të ardhshme ne mund të presim që Le Pen dhe numri dy i saj Jordan Bardella të prezantohen si alternativa e vetme që ofron rend dhe stabilitet.

Humbja e së dielës mund të duket vetëm si një pengesë e përkohshme.

Burimi: Financial Times/

Kisha katolike hedh poshtë Censin: I rremë! Besimtarët katolikë janë reduktuar

Tkurrja e popullsisë dhe largimi i të rinjve janë dy shqetësimet e ngritura nga Kisha Katolike pas publikimit të të dhënave të Censusit të vitit 2023.

Në një reagim zyrtar, i pari reagim që vjen nga përfaqësuesit e feve në Shqipëri, Kisha Katolike ka folur edhe për numrin e katolikëve të regjistruar, duke thënë se do nisë një census në Dioqezat dhe famullitë e tyre për të njohur numrin e katolikëve në vend.

“Mbyllja e procesit të Censusit dhe dalja e rezultateve të tij është një moment që na intereson edhe ne si Komunitet katolik. Dy fakte na shqetësojnë si Kishë katolike. Së pari tkurrja e popullsisë me rreth 410000 njësi në krahasim me Censusin e vitit 2011. Ne mendojmë se numri është më i lartë se kaq. Është një fenomen që ne si Kishë katolike e kemi ndier dhe e kemi shprehur herë pas here, për shkak edhe të pranisë sonë kapilare në territorin e Shqipërisë. Ne kemi qenë dëshmitarë të largimit masiv të familjeve shqiptare jashtë Shqipërisë dhe e përjetojmë përditë këtë plagë. Kjo është e lidhur me një shqetësim të dytë që statistikat e tregojnë: tkurrja e moshës së re dhe e moshës së punës. Kjo sjell pasoja në zhvillimin e shoqërisë e sidomos në mirëqenien shpirtërore dhe ekonomike të familjeve shqiptare”, thuhet në njoftimin zyrtar të kishës katolike.

Kjo tkurrje e numrit të të rinjve, sipas Kishës Katolike ul përkujdesjen ndaj moshës së rritur e sidomos moshës së tretë, “fenomen ky që e kemi ndeshur dhe e ndeshim çdo ditë në vizitat nëpër familje, ku shpesh shohim e takojmë të moshuar të vetmuar e pa përkrahje”.

Kjo tkurrje po ashtu ul numrin e martesave dhe familjeve të reja që janë garanci për lindjen dhe edukimin e fëmijëve, si detyra themelore të martesës dhe familjes e që garantojnë vazhdimësinë jo vetëm numerike, por edhe cilësore të shoqërisë, shkruhet ndër të tjera në njoftim.

Largimi i moshës së re është mungesë e një aseti që varfëron Shqipërinë dhe kësisoj, Kisha Katolike shkruan se duhet të zhvillohen politika më të favorshme arsimi dhe punësimi që të rinjtë të gjejnë motiv për të qëndruar në vendin e tyre.

“Ndaj, ne ftojmë qeverinë, por edhe të gjithë faktorët e tjerë socialë, që me anë të një bashkëpunimi serioz, sidomos në fushat e punësimit dhe të arsimit, të nxisin të rinjtë që të qëndrojnë në atdheun e tyre. Politikat për familjet e reja, të cilat e nisin jetën e tyre martesore, duhet të jenë gjithashtu një prioritet në politikat zhvillimore”.

Së fundi, për sa i përket numrit të katolikëve, Kisha thotë se ne nuk kanë elemente në dorë për të gjykuar nëse realisht është ky numri i katolikëve në Shqipëri.

“Tkurrja e përgjithshme e popullsisë ka sjellë edhe tkurrjen e katolikëve dhe ikjen e tyre në vendet perëndimore, kryesisht në Evropë dhe në Amerikën veriore. Në këto vite, ne si komunitet katolik, nuk kemi kryer regjistrime për popullsinë. Prandaj, edhe neve na lind një angazhim për ta kryer këtë Census nëpër Dioqezat dhe famullitë tona për ta njohur, edhe pse përafërsisht, por me realizëm, numrin e katolikëve në territor”.

Kisha uron që të dhënat, statistikat, që kanë dalë nga ky Census, me gjithë marzhat e gabimit apo shkarjet përgjatë procesit, të jenë një shtysë për të krijuar strategji zhvillimore për të ardhmen e familjeve dhe shoqërisë shqiptare në tërësinë e saj.

Sipas të dhënave të bëra publike nga Censusi, numri i katolikëve në territorin shqiptar është 201 530.

Trembet Balluku: Thumanë – Kashar jo 2.7, por 2.1 euro

Ministria e Infrastrukturës dhe Energjisë ka reaguar për mediat mbi problematikat e hasura në aksin rrugor Thumanë-Kashar, duke njoftuar se sistemi i pagesës do të rihapet në ditët në vijim, por qytetarët do të njoftohen paraprakisht.

MIE thotë se pagesa do të jetë 2.1 euro pa TVSH ose këmbyer në lekë, sipas kursit zyrtar të Bankës së Shqipërisë, ditën e hapjes së sistemit të pagesave.

Deri në nisjen e këtij procesi, kompania do të kryejë në segmente të ndryshme kohore, testime të kufizuara të sistemit të pagesës, për të kolauduar sistemin dhe aftësinë përpunuese të stafit. Lidhur me orarin e këtyre testimeve publiku do të njoftohet 24 orë më përpara.

“Ministria e Infrastrukturës dhe Energjisë kërkon mirëkuptimin e qytetarëve gjatë fazës së kolaudimit, pasi ky aks rrugor u hap përpara afatit për t’i dhënë frymëmarrje qarkullimit dhe për të lehtësuar trafikun në akset e veriut si dhe për të ndihmuar qytetarët që qarkullojnë në këto akse”, thuhet në njoftimin e MIE.

Inflacioni në Shqipëri ra pak në qershor, por çmimet janë më të shtrenjta se një vit më parë

Inflacioni në Shqipëri ra lehtë gjatë muajit qershor, duke shënuar 2.1%. Një vit më parë, inflacioni raportohej 4.5%.

Nga një vit më parë, INSTAT raporton se rritjen më të fortë të cmimeve e kanë patur mobiljet dhe pajisjet shtëpiake, me 3.7%, ndjekur nga pijet alkoolike dhe duhani me 3.3%. Veshjet dhe këpucët janë shtrenjtuar me 3.2%, ndërsa grupi I qirasë, ujjit, energjisë dhe hoteleri bar-restorant, janë shtrenjtuar me 2.2%.

Ushqimet dhe pijet joalkoolike janë rritur me 2%, por produktet e bulmetit dhe vezët me 3.4%.

Ndërsa nga muaji maj, INSTAT tregon se cmimi i ushqimeve dhe pijeve joalkoolike është ulur me 1.1% dhe transporti (karburantet) me 0.4%. Në raport mujor, veshjet, pijet alkoolike dhe duhani janë rritur me 0.4 dhe 0.3% respektivisht.

Që prej marsit të këtij viti, inflacioni në vend zbriti poshtë objektivit të Bankës së Shqipërisë, duke dalë jashtë pritshmërive dhe duke ndikuar menëjherë politikën monetare. Pa vonuar shumë , BSH uli normën e interesit si një përgjigje ndaj inflacionit në rënie, edhe pse pranoi se presionet e brendshme janë ende prezente.

Tensionohet më tej marrëdhënia e Bardhit me menaxherin. Këngëtarit i anullohet koncerti 22-vjeçari nga Lipjani synon Çmimin Nobel

Të enjten e parë të muajit shkurt të vitit të kaluar, Bujar Mehmeti nuk do ta harrojë kurrë. Atëkohë vetëm 20 vjeç, ai mori një ofertë që t’i niste studimet e doktoraturës për fizikë mjekësore në SHBA.

Edhe pse vetë kishte aplikuar në dy universitete amerikane, ai priste që procesi deri në përzgjedhjen përfundimtare të zgjaste të paktën deri në gjysmën e prillit.

“Ka qenë një intervistë gati dyorëshe dhe kemi biseduar për tema të ndryshme. Në fund të intervistës, profesori ka vendosur të ma ofrojë pozitën e asistentit dhe më ka thënë që dëshiron që unë të jem pjesë e laboratorit të tij”, thotë Bujari, nga fshati Babush i Muhaxherëve i Lipjanit, për Radion Evropa e Lirë.

Oferta ishte e papritur, por Mehmetit nuk iu nevojit shumë kohë për të vendosur. Ai i tha “po” atë ditë Universitetit Wisconsin-Madison, njoftoi universitetin tjetër amerikan se po tërhiqej nga gara dhe pak muaj më vonë u nis për në SHBA.

Bujar Mehmeti, duke mbajtur flamurin e Kosovës gjatë përfaqësimit të Kosovës në një garë ndërkombëtare në vitin 2019.
“Ky universitet, sidomos për kërkime shkencore në këtë fushë, është i përsosur. Buxheti i universitetit është rreth katër miliardë dollarë. Për më tepër që doktoratura është një rrugëtim i gjatë dhe është e rëndësishme që të të pëlqejë ajo që do ta hulumtosh”, shton 22-vjeçari.

Bujarit i është thënë se është personi më i ri në moshë që është pranuar ndonjëherë në studimet për doktoraturë në këtë departament. Sipas Academia Insider, mosha mesatare e studentëve në doktoraturë në SHBA është 31.5 vjeç.

Por, edhe pse ishte vetëm 20 vjeç kur e mori ofertën, ai kishte mjaftueshëm përvojë sa ta bindte profesorin e tij. E, në SHBA, studentëve u mundësohet të kalojnë nga niveli bachelor drejt në atë të doktoraturës. Universitetet u japin diplomë të masterit këtyre studentëve gjatë rrugëtimit të tyre drejt diplomës së doktoraturës.

Gjatë studimeve të nivelit bachelor në Hungari kishte qenë student i dalluar, i përfshirë edhe në përfaqësimin studentor të universitetit. Nëpër gara ndërkombëtare shkencore në SHBA, Britani të Madhe e vende të tjera, ai e kishte përfaqësuar Kosovën dhe ishte kthyer me medalje.

Gjatë studimeve në Hungari, kishte eksperimentuar me grimca metalike magnetike dhe me ekuacione se si këto grimca mund të përdoren për ta trajtuar kancerin.

Tek ai, Bujari thotë se profesori i tij kishte parë dikë që ka njohuri për fizikë dhe pasion për t’i aplikuar ato njohuri në shërbim të shoqërisë.

“Ai e ka parë qëllimin tim dhe në njëfarë mënyre është pjesë e asaj ëndrrës sime dhe rrugëtimit tim”, thotë Bujari.

Kështu, pas diplomimit në Hungari, në fund të gushtit të atij viti, Bujari u nis për në Madison në SHBA. Mban mend nxehtësinë e pazakontë në ditët e tij të para, takimet me kolegët e rinj dhe profesorin e tij, por është një tjetër takim që i ka ngelur më shumë në mendje.

“Kur kam hyrë brenda departamentit dhe kam parë pajisjet… ka qenë një lloj shoku. Janë pajisjet më të avancuara të shkencës së fizikës mjekësore. Janë pajisje milionëshe me të cilat mund të punosh, i ke në duar”, tregon ai.

Aktualisht, Bujari është i angazhuar në një projekt që synon ta sjellë një metodë të re të fotografimeve mjekësore.

Më shumë sesa synimi për ta lehtësuar punën e radiologëve, atë e motivon qëllimi për ta lehtësuar jetën e pacientëve, duke i ekspozuar ndaj një niveli më të ulët të rrezatimit.

Dëshira për të sjellë ndryshim për të mirë e kishte nxitur Bujarin të interesohej në shkencat e mjekësisë dhe fizikës qysh i vogël.

“Thjesht, e di që kudo ku jam, çkado që jam duke bërë, qëllimi është që të punoj në të mirën e shoqërisë. Shpresoj që arritjet e mia do të ndikojnë në përmirësimin e jetës së të sëmurëve me kancer apo me sëmundje të tjera, përmes pajisjeve që i funksionalizojmë apo shpikim”, thotë Bujari.

Çmimin Nobel thotë se e ka ëndërr njëjtë si çdo i ri tjetër që hyn në këtë fushë, por ëndrrat e tij e kthejnë shpesh edhe në Kosovë.

“Shpresoj që do të arrij të kontribuoj edhe në Kosovë – qoftë duke nisur bashkëpunim me kompani amerikane që mund të dhurojnë pajisjet e tyre për spitalet publike në Kosovë, qoftë përmes lidhjes së bashkëpunimit mes Universitetit të Prishtinës dhe universiteteve këtu”, thotë Bujari.

Në dy dekadat e para të jetës së tij, Bujari ka listuar një sërë arritjesh. Ai është edhe pjesë e udhëheqësisë së klubit Astronomy Outreach of Kosovo, që një muaj më parë e hapi Observatorin dhe Planetariumin e parë Kombëtar në Kosovë.

Por, në mesin e arritjeve dhe synimeve, një gjë e bën më të lumtur.

“I kam bërë krenarë dhe të lumtur prindërit e mi. Nuk është qëllimi që ata të dalin e të thonë që Bujari ka arritur diçka, por thjesht e di që jam në një rrugë të drejtë dhe e di që po bëj diçka të mirë kur e di që ata janë të lumtur me rrugëtimin që kam zgjedhur”, përfundon ai.

Helmimi në Bulqizë/ Dalin analizat e ujit. Çfarë tregojnë përgjigjet

Shërbimi i Epidemiologjisë dhe Shëndetit Mjedisor në Bulqizë ka publikuar rezultatet e analizave të ujit të marra në disa vende të ndryshme.

Nga raporti i këtij institucioni thuhet se në mostrat e marra në 7 vende të ndryshme dhe të analizuara mikrobiologjikisht nuk ka rezultuar të ketë ndotje bakterologjike.

Sipas raport-analizës uji është i përshtatshëm për përdorim.

Nga ana tjetër mësohet se specialist të Institutit të Shëndetit Publik në Tiranë kanë mbërritur ditën e sotme në Bulqizë ku kanë mbledhur kampione të tjera uji për të bërë analizë më të thelluar.

Disa nga rastet e paraqitura në spital për ndihmë mjekësore janë rikthyer edhe pasi kanë dalë nga spitali, ndërsa shkaku vijon të mbetet mister.

Zvarritje dhe zhvatje: Si u zgjerua skandali i mikrokredive pas kallëzimeve në Prokurori

Një ditë para vdekjes së tij tragjike, Pal Trashaj besonte ende te drejtësia.

Pas denoncimeve të shpeshta publike dhe zyrtare për një skemë mashtrimi me mikrokreditë, 63- vjeçari nga Lezha kapërceu më 2 korrik portën e Prokurorisë së Posaçme në Tiranë në kërkim të një takimi me një oficer të Byrosë Kombëtare të Hetimit. Ai kërkonte të dinte se ç’kishte ndodhur me denoncimin e tij.

Sipas një njoftimi të SPAK, oficeri i informacionit i kërkoi Trashajt që të priste. Por Trashaj nuk u kthye më dhe pak orë më vonë piu fostoksinë në shenjë proteste në oborrin e SPAK – helm që i shkaktoi vdekjen një ditë më pas.

Kalvari i Trashajt nisi 16 vjet më parë me marrjen e një kredie prej 550 mijë lekësh në institucionin financiar NOA për zgjerimin e sipërmarrjes së tij të vreshtarisë. Por në vitin e katërt të kredisë ai humbi punën dhe u përball me vështirësi për të paguar.

Në një letër dërguar NOA-s në nëntor të vitit 2011 të cilën BIRN e disponon, Trashaj kërkonte dëshpërimisht shtyrjen e pagesës së këstit për shkak se ishte i papunë dhe kishte tre fëmijë në universitet.

“Më duhet të paguaj masterin 65 mijë lekë të njërit prej fëmijëve, ndaj kërkoj shtyrjen e këstit për në datat 7-10 dhjetor,” thuhet në letër.

Edhe pse besonte se e kishte shlyer kredinë, Trashaj rezultoi sërish debitor në vitin 2018 për një vlerë minimale prej 47 mijë lekësh bashkë me kamatë-vonesat. Në vitin 2018, kredia e tij u ble nga Micro Credit Albania dhe vlera e saj gati u dhjetëfishua në 450 mijë lekë.

Gledis Trashaj deklaroi për mediat pas vdekjes së të atit se ata ishin përndjekur për vite me radhë, duke iu bllokuar llogaritë e pagave, shtëpia dhe makina.

“Babai im po kërkonte drejtësi për padrejtësitë që i janë bërë, sepse e kishte paguar kredinë. Ka qenë njeri parimor dhe ka shkuar në SPAK duke patur shpresë se do të marrë drejtësi,” tha Gledis Trashaj i revoltuar.

MCA tha në një deklaratë publike se sekuestrot mbi të ndjerin Trashaj ishin hequr në janar 2023 dhe se shoqëria “nuk ka tejkaluar në asnjë moment kompetencat e saj”.

Megjithatë, drejtësia vonoi të vinte për Pal Trashajn dhe mijëra qytetarë të tjerë që po kalojnë të njëjtin kalvar.

Të dhënat e siguruara nga BIRN përmes një korrespondence mes Ministrisë së Drejtësisë dhe Këshillit të Ministrave tregojnë se pavarësisht se skandali me mikrokreditë u zbulua dhe u denoncua të paktën që nga viti 2020, skema jo vetëm që nuk u bllokua, por u zgjerua dhe sofistikua, duke rënduar edhe më shumë pozitat e mijëra viktimave nga çdo cep i Shqipërisë.

Të dhënat tregojnë gjithashtu se ndërsa një sërë institucionesh bënë një sy qorr në pritje të rezultatit të hetimeve, Prokuroria e Posaçme dhe ajo e Tiranës u përfshinë një një konflikt kompetencash – çka solli zvarritje të procedimeve dhe arrestime të pjesshme të personave të përfshirë vetëm katër vite më pas.

Në të njëjtën kohë, mijëra urdhra të reja sekuestroje u ekzekutuan nga një grup përmbaruesish privatë në dëm të qytetarëve kredimarrës.

Më 23 maj, Prokuroria e Tiranës lëshoi urdhër arreste ndaj 9 personave të përfshirë në skemën e abuzimit me mikrokreditë, në qendër të së cilave gjenden institucionet financiare Micro Credit Albania dhe Final, zyra ligjore ADCA dhe disa shërbime përmbarimore. Një hetim i dytë iu dërgua për kompetencë Prokurorisë së Posaçme për shkak se vlerësohet se përgjegjësitë shtrihen deri te guvernatori i Bankës së Shqipërisë, Gent Sejko.

Sipas vlerësimit të Ministrisë së Drejtësisë në qershor të këtij viti, “situata paraqitet tejet serioze dhe kërkon adresim të menjëhershëm në të gjitha instancat ligjzbatuese që janë përgjegjëse për zbatimin e ligjit”.

E pyetur nga BIRN për vonesën e hetimeve, Prokuroria e Tiranës tha përmes një zëdhënëseje se përveç çështjes së kompetencës me SPAK, materialet ishin voluminoze dhe përfshinin një numër të stërmadh prej 17 mijë subjektesh.

“…Për kryerjen e veprimeve hetimore përkatëse është dashur një kohë e konsiderueshme për verifikimin e të gjitha fakteve,” tha Prokuroria e Tiranës.

Ndërkohë, përgjigja e SPAK ishte më diskrete.

“Procedimi penal për të cilin kërkoni informacion ndodhet në fazën e hetimeve paraprake, për këtë arsye nuk mund të ndajmë asnjë informacion me mediat,” tha zëdhënësja e SPAK.

Mijëra urdhra sekuestrosh

Kompania Micro Credit Albania u bë simboli i një tregu spekulant të shit-blerjes së kredive të këqija përgjatë dekadës së fundit në Shqipëri, në bashkëpunim edhe me zyra ligjore apo një grup zyrash private të përmbarimit gjyqësor.

Ajo akuzohet se përdori shtrëngimin përmes bllokimit të pronave për të detyruar debitorët e falimentuar që të merrnin kredi të reja po te e njëjta kompani për të shlyer të vjetrën, duke krijuar një zinxhir zhvatës.

Sipas një kallëzimi të ri penal të Ministrisë së Drejtësisë në Prokurorinë e Tiranës që mban datën 31 maj 2024, hetimet ndaj kësaj skeme masive të abuzimit ishin të vonuara, të pamjaftueshme dhe lanë jashtë një grup përmbaruesish gjyqësorë, të cilët vazhduan praktikat e bllokimit të pasurive edhe disa vite pas nisjes së hetimeve.

Në letrën drejtuar Prokurorisë së Tiranës, ministri Ulsi Manja kujton se edhe pse paraardhësja e saj në detyrë, Etilda Gjonaj e ka kallëzuar skemën që në vitin 2020, abuzimet jo vetëm që nuk u ndalën, por u sofistikuan edhe më tej.

“Rezulton se tashmë, personat e kallëzuar që në vitin 2020, në vlerësimin tonë kanë vijuar dhe përsosur aktivitetin e tyre, në mënyrë edhe më të organizuar, duke përfshirë të tjerë më pas, e duke sjellë dëme në masë të gjerë për qytetarët dhe shoqërinë,” shkruhet në kallëzim.

Ministri i Drejtësisë kërkon që prokuroria të hedhë dritë mbi aktivitetin e 14 personave të tjerë, 4 subjekteve tregtare dhe 2 kompanive në fushën e ndërtimit, të cilët dyshohet gjithashtu se janë përfshirë në skemën e abuzimit edhe pse çështja po hetohej nga Prokuroria.

Mes provave të dorëzuara rezultojnë disa shkresa të bankës Raiffesen, e cila kishte evidentuar mijëra procedura përmbarimore të kryera brenda një periudhe të shkurtër në vitin 2023 nga disa përmbarues, që vlerësohet se ishin fizikisht të pamundura të bëheshin nga një person i vetëm.

Sipas kallëzimit, 11.336 urdhra për vendosjen e sekuestrove përmbajnë vulën e përmbaruesit Fatos Alimadhi, ndërsa 1904 urdhra të tjerë përmbarimorë vulën e Lefter Canajt – të gjitha për llogari të MCA-së.

Kallëzimi evidenton gjithashtu se ministri i Drejtësisë u kishte hequr licencën këtyre përmbaruesve 1 vit më parë, por asnjëri prej tyre nuk kishte bërë dorëzimin e akteve dhe vulave “duke iu shmangur në mënyrë abuzive detyrimit ligjor”.

Sipas hetimit administrativ të Ministrisë së Drejtësisë, gjatë vitit 2023 janë zhvilluar në total 1966 ankande publike për të shitur pronat e bllokuara të qytetarëve, të gjitha të kryera nga zyra e përmbarimit privat “TDR Group” përmes përmbaruesit Rigels Bejko, procedura që dyshohet të jenë bërë nga punonjësit e MCA dhe ADCA.

“Dyshohet se pas shpalljes së ankandeve për shitjen e pasurive të paluajtshme, këto pasuri të nxjerra në ankande ku pala debitore nuk kishte dijeni për zhvillimin e tyre, me një vlerësim të dyshuar fiktiv të pronës… është propozuar më pas marrja në pronësi të kreditorit MCA ose Final kundrejt një vlere të papërfillshme monetare dhe mbi të gjitha për vlera detyrimesh të pretenduara,” thuhet në kallzim.

Në një rast që paraqitet në listën e provave, rezulton një apartament 70 m2 në Tiranë që është vendosur nën sekuestro për një vlerë detyrimi prej 231 mijë lekësh dhe është nxjerrë në shitje për 390 mijë lekë. Pasi nuk u paraqit asnjë ofertë, apartamenti kaloi në pronësinë e MCA.

Ministri Manja i kërkon prokurorisë hetimin e shoqërisë përmbarimore ‘TDR Group’, noteres që ka bërë nënshkrimet e kontratave të kredive, vlerësuesve të pasurive të patundshme, zyrës ligjore ‘ADCA’ dhe administratorit të shoqërisë ‘MCA’ dhe atij të ‘TDR’. Në padi sugjerohet të shihen dhe veprimet që përmbaruesi i zyrës ‘TDR Group’, Florian Shehu, ka kryer me dy kompanitë e tjera që zotëron në fushën e ndërtimit ‘ABA Enginieering’ dhe ‘TREMO 2 ALB’, ku ngrihen dyshime për një skemë pastrimi me paratë që përfitoheshin në mënyrë të paligjshme nga mikrokreditë.

Të pyetur për akuzat, përmbaruesit Rigels Bejko dhe Florian Shehu mohuan çdo keqbërje në komunikime të veçanta me BIRN.

Bejko tha se ishte hetuar nga Prokuroria e Tiranës për këto pretendime dhe çështja ishte pushuar sipas tij në prill të këtij viti. “Jam hetuar dhe nuk kam rezultuar fajtor. Po të ishin zhvilluar procedurat në shkelje, nuk do të na lejonte askush të bënim afishimin në bashki e gjykata,” tha Bekjo.

Edhe Shehu pretendoi se aktiviteti i tij kishte qenë i ligjshëm, ndërsa shtoi se ishte larguar nga shoqëria përmbarimore TDR Group, ku kishte qenë më parë i punësuar.

“Çdo punim civil është kryer me kontrata dhe fatura të rregullta dhe kam patur aktivitet të shkurtër. Sot që flasim, kompanitë janë të pezulluara dhe nuk kanë lidhje me përmbarimin. Çfarë pastrimi parash mund të dyshohet?” pretendoi ai.

Ministria e Drejtësisë i tha BIRN se ndonëse kishte bërë përpjekje të vazhdueshme, “nuk është bërë ende i mundur dorëzimi i arkivës nga ish-përmbaruesit gjyqësorë, dhe për këtë arsye Zyra e Përmbarimit Shtetëror Tiranë i është drejtuar Prokurorisë Tiranë me kallëzimin për ndjekje penale në datën 5 qershor”, ndërsa për përmbaruesit që kanë ende licencë aktive, ka nisur hetimi disiplinor

Ping-pongu i hetimeve

Prej vitit 2020, në Prokurorinë e Tiranës janë depozituar një seri kallëzimesh penale ndaj Micro Credit Albania dhe kompanive të tjera të lidhura me të, por disa prej çështjeve nuk u filluan apo u dërguan për pushim, ndërsa të tjera u transferuan në prokuroritë e rretheve, u pezulluan ose vijojnë të jenë ende në fazën e hetimeve.

Prokuroria e Tiranës i tha BIRN se aktualisht vijon hetimet për 5 procedime penale në lidhje me mikrokreditë, ku një pjesë e tyre është bashkuar me procedime të tjera penale.

Në serinë e kallëzimeve të depozituara, dy prej çështjeve patën më shumë jetëgjatësi se të tjerat. Njëra derivon nga kallëzimi prej 700 faqesh i Ministrisë së Drejtësisë i depozituar në vitin 2020, i regjistruar si procedimi penal me nr.2123 dhe çështja tjetër është procedimi penal me nr. 9037 e regjistruar në vitin 2022.

Procedimi penal me nr. 2123 u hetua nga prokurorët Arben Agovi dhe Ndini Tavani, të cilën konstatuan moskompetencë në vitin 2021 dhe e përcollën dosjen për në SPAK. Por Prokuroria e Posaçme nuk ra dakord dhe e ktheu sërish dosjen mbrapsht në Prokurorinë e Tiranës.

Prokuroria e Tiranës i tha BIRN në përgjigje të një kërkese për koment se “shpallja e moskompetencës në rastin e procedimit penal nr. 2123 të vitit 2020 është bërë referuar nenit 75/a, gërma a”, i cili parashikon veprat penale që gjykohen nga SPAK, përfshirë edhe korrupsionin e zyrtarëve publikë.

Pas rikthimit të dosjes në Prokurorinë e Tiranës, hetimet vazhduan edhe për tre vjet të tjera, derisa prokurorët kërkuan në gjykatë masa arresti për pronaren e MCA, Elda Ibro, pronarin e Final, Arben Meskuti dhe shtatë personave të tjerë të implikuar.

Edhe procedimi penal me nr.9037 përfundoi në SPAK në prill të vitit 2024, por nuk u kthye më mbrapsht.

Prokuroria e Tiranës shpalli moskompetencë dhe i kërkoi Prokurorisë së Posaçme të hetonte përgjegjësi të mundshme të guvernatorit të Bankës së Shqipërisë, Gent Sejko, i cili dyshohet se nuk ka vepruar në kohë për të ndalur abuzimet e MCA. Sipas prokurorëve, Sejko ka ndërmarrë masa për bllokimin e pjesshëm të aktivitetit të MCA vetëm dy vjet pasi inspektorët e BSH kishin vërejtur probleme në administrimin e kompanisë.

Sipas SPAK, referimi për Sejkon ndodhet në fazën paraprake të hetimeve.

Zvarritja e hetimeve për mashtrimin me mikrokreditë ka vënë në lëvizje dhe Inspektorin e Lartë të Drejtësisë.

“Informacioni i bërë publik po vlerësohet e trajtohet nga ana e ILD në përputhje me pjesën 5, kreu II, të Ligjit për Statusin e Gjyqtarëve dhe Prokurorëve,” tha ILD përmes zëdhënëses.

Në “lojë” edhe bankat

Hetimet e deritanishme kanë zbuluar se një nga format më të mëdha të presionit që ushtronin përmbaruesit dhe punonjësit e shoqërive ‘MCA’ dhe ‘Final’ ishte bllokimi i llogarive bankare, përfshirë atë të pagës, duke cënuar dhe minimumin jetik të kredimarrësve.

“Qytetarët dyshohet se janë mbajtur peng dhe janë imponuar që përmes llogarive të sekuestruara bankare, sidomos llogarive të pagës, pa asnjë mundësi për përballimin e jetesës së përditshme, të shtrëngohen të marrin kredi të re për të ‘ristrukturuar të vjetrën’,” thuhet në kallëzimin e ri të ministrit Manja.

Në skemat e abuzimit që evidenton Ministria e Drejtësisë është bllokimi i çdo prone dhe të ardhure, në mënyrë që të pranohet detyrimi i shumëfishuar nga subjektet e mbledhjes së borxhit. Sekuestro nuk pranohej të hiqej nëse debitori nuk paguante detyrimin e fryrë ose të firmoste kontratë për të marrë kredi të re me interesa të larta.

Ministria e Drejtësisë vlerëson gjithashtu se problemet me bllokimin jashtë çdo afati të llogarive të klientëve të MCA vijojnë “në shkelje të rëndë të çdo procedure ligjore”. Ministri Ulsi Manja sugjeron të kryhen veprime hetimore mbi dokumentacionin origjinal që gjendet në bankat e nivelit të dytë e sidomos në bankën ‘BKT’, se sa llogari bankare dhe depozita janë sekuestruar dhe vazhdojnë të mbahen të tilla nga akte fiktive të përmbaruesve.

BKT tha në një përgjigje me shkrim që se vepron në përputhje me ligjet dhe rregulloret në fuqi dhe në përputhje me urdhrat përmbarimorë, urdhrat tatimorë, urdhrat e gjykatës ose çdo urdhër tjetër të lëshuar nga organe të cilat e kanë atë pushtet nga ligji.

“Sipas ligjit në fuqi, bankat kanë një rol pasiv dhe nuk kanë autoritet për të interpretuar apo vlerësuar legjitimitetin e urdhrave të lëshuar nga autoriteti legjitim që lëshon këto urdhëra. Bankat vendosin sekuestro mbi llogaritë me kërkesë ligjore të përmbaruesit dhe i mban ato deri në ekzekutimin ose urdhrin e heqjes së sekuestros,” tha BKT.

“Sa herë që ndryshon statusi ligjor i një përmbaruesi, pasardhësi duhet të caktohet nga autoritetet përkatëse,” shtoi Banka.

Ministri i Drejtësisë kërkon hetime të thelluara për veprat penale të mashtrimit, përvetësimit të titullit apo detyrës shtetërore, shpërdorimit të detyrës, fshehjes së të ardhurave dhe pastrimit të produkteve të veprës penale.

“Shtrirja reale e pasojave që dyshohet se janë shumë të rënda në aspektin social-ekonomik për mijëra qytetarë do të duhet të verifikohet gjatë hetimit penal të kësaj veprimtarie të dyshuar kriminale të kryer në bashkëpunim, për një kohë relativisht të gjatë,” thuhet në kallëzim.

Roli i Bankës së Shqipërisë

Dy subjektet në qendër të skandalit me mikrokreditë, ‘MCA’ dhe ‘Final’ blenë në total rreth 30 mijë kontrata kredish të këqija me vlera që nuk kalojnë 10% të shumës së detyrimit. Por problemet me mbifaturimet dhe abuzimet me debitorët nisën thuajse menjëherë pasi ato u licencuan nga Banka e Shqipërisë në vitin 2016.

Gjithsesi, u deshën me dhjetra ankesa dhe disa vite që Banka e Shqipërisë t’u revokonte atyre licencën. I pyetur për këtë çështje, guvernatori Gent Sejko sqaroi në një seancë dëgjimore në Kuvend se nuk kishte mundësi të vepronte, për sa kohë prokuroria nuk kishte nën akuzë asnjë nga personat e kallëzuar nga Ministria e Drejtësisë.

“Jemi në kushtet kur ata nuk plotësojnë më kriterin e reputacionit të lartë etik, i cili ndër të tjera konsideron që individi të mos jetë në ndjekje penale, në gjykim për vepra penale dhe i dënuar penalisht” njoftoi banka qëndrore pas revokimit të licencave për dy subjektet ‘MCA’ dhe ‘Final’. Të dy subjektet kanë kundërshtuar vendimin duke kërkuar vijimin e aktivitetit.

Prokuroria e Tiranës dyshon se dhënia e të drejtës subjekteve për të mbledhur detyrimet dhe dhënë kredi është bërë në konflikt interesi dhe se aktiviteti për shitjen e kredive nga bankat ka nisur përpara se të ndryshohej rregullorja nga ana e bankës qendrore.

Në një përgjigje me shkrim Banka e Shqipërisë i tha BIRN se edhe pse i ka revokuar licencat e shoqërive ‘Final’ dhe ‘Micro Credit Albania’, qytetarët kredimarrës duhet të vazhdojnë të bëjnë pagesa ndaj këtyre kompanive në përputhje me kushtet dhe termat e kontratës përkatëse të lidhur me subjektin, pasi këto detyrime nuk do të jenë subjekt faljeje.
Në datën 5 Qershor Këshilli Mbikëqyrës i Bankës së Shqipërisë ka miratuar disa ndryshime në rregulloren “Për licencimin dhe ushtrimin e veprimtarisë nga subjektet financiare jo banka”, në të cilat ndër të tjera parashikohet roli dhe kompetencat e likuidatorit të portofolit të kredive të këtyre kompanive.

Ne lidhje me rastin e të ndjerit Pal Trashaj, Banka e Shqipërisë shprehu keqardhje dhe shtoi se po grumbullonte informacion për të analizuar rastin.

“Për këtë rast, tashmë sa sensitiv, por dhe aq kompleks, Banka e Shqipërisë po grumbullon dhe do të analizojë të gjithë informacionin e nevojshëm, ne mënyrë që të sigurohet një situatë sa më e plotë dhe e qartë e çdo hallke të procesit dhe gjithçka ka ndodhur brenda secilës prej tyre,” përfundoi Banka e Shqipërisë./ Reporter.al