Day ArchiveOsmani e Kurti bashkë në zgjedhje. Kandidatë për President e Kryeministër

Ushtruesja e detyrës si presidentes së Kosovës Vjosa Osmani iu bashkua garës zgjedhore në një listë me Lëvizjen Vetëvendosja të udhëhequr nga Albin Kurti, për zgjedhjet e përgjithshme që do të mbahen me 14 shkurt. Që të dy synojnë dy postet kryesore të vendit, Albin Kurti kryeministër dhe Vjosa Osmani presidente, ndonëse për këtë të fundit zgjedhja bëhet me vota të deputetëve dhe jo në zgjedhje të drejtpërdrejta për president. Nënshkrimin e marrëveshjes që të konkurojnë në një listë, në listën e Vetëvendosjes, Albin Kurti dhe Vjosa Osmani e bënë në një konferencë të përbashkët për medie në hollin e kuvendit  të Kosovës.

“Osmanin dhe mua do të na gjeni në të njëjtin vend dhe me të njëjtin qëllim. Kemi bërë marrëveshjen e synimeve për një shtet me drejtësi dhe pa korrupsion. Për një shoqëri me shëndet e arsim. Në fushatën zgjedhore do të jemi bashkë. Të shtunën e 6 janarit e dorëzojmë listën e kandidatëve për deputet”, tha Albin Kurti, duke shtuar se ai “do të jetë kandidat për kryeministër dhe ushtruesja e detyrës së presidentes Vjosa Osmani, do të riligjitimohet në këtë pozitë”.

U.d. si presidente, Vjosa Osmani që tashmë zyrtarisht është në listën e lëvizjes Vetëvendosja,  tha se “marrëveshja që është arritur sot e përfaqëson vullnetin e qytetarëve” dhe shtoi se bashkimi i tyre shkon përtej një liste.

“Ne jemi të vendosur për të luftuar kundër krimit të organizuar e korrupsionit. Jemi të vendosur për të mbrojtur kushtetutën e vendit. Jemi të vendosur për një Kosovë që secili mund të sigurojë një jetë të dinjitetshme. Kosova ka nevojë për një kryeministër që nuk do t’i mbyllë sytë përballë padrejtësive”, tha Vjosa Osmani.

Vjosa Osmani në zgjedhjet e vitit 2019 ishte Kandidate e LDK-së për kryeministre. Pas fitores së lëvizjes Vetëvendosja, ku kryeministër u zgjodh Albin Kurti, Vjosa Osmani mori postin e kryetares së Kuvendit të Kosovës. Më pas qeveria Kurti u shkarkua me një mocion të LDK-së. Vjosa Osmani ishte kundër prishjes së këtij koalicioni dhe që nga ajo kohë, ajo ndau rrugët me partinë e saj të vjetër LDK. Në korrik të vitit 2020 Osmani u shkarkua edhe nga postet udhëheqëse në LDK. Partitë e tjera që tashmë do të garojnë në zgjedhje, ende nuk kanë publikuar listat e tyre, ndonëse kandidatët për kryeministra janë bërë publik. Lidhja Demokratike e Kosovës, për kryeministër konkuron me Avdullah Hotin, i cili aktualisht është kryeministër në detyrë. Partia Demokratike e Kosovës, PDK, garon me kandidatin Enver Hoxhaj dhe Aleanca për Ardhmërinë e Kosovës, nuk ka kandidat për kryeministë, pasi Ramush Haradinaj, synon postin e presidentit të vendit.

Aksident i frikshëm në qendër të Tiranës. Shihni videon

Një aksident i ndodhur pranë ambasadës italiane në Tiranë shkaktoi dy të plagosur. Një makinë tip BMW që vinte nga Piramida në drejtim të Stadiumit Kombëtar goditi një autoveturë tjetër që lëvizte nga Liceu Artistik në drejtim të Kryeministrisë. Pamjet filmike të një kamera sigurie që disponon Zoom.al tregojnë dinamikën e plotë të ngjarjes. Mjeti tip BMW hyn në semafor me të kuqe dhe me shpejtësi dhe godet makinën tjetër, duke e spostuar disa metër dhe vetë rrotullohet në vend e merr flakë. Në momentin e përplasjes, mbi vijat e bardha po kalonin disa qytetarë, por për fat të mirë nuk u prekën nga makinat. Dy drejtuesit e makinave morën plagë të lehta. Shihni më poshtë videon e siguruar nga Zoom.al.