zoom

Aktualitet

Vranë të riun me thikë në zemër pas sherrit për një vajzë në Sauk, çohen në gjyq 4 të dyshuarit

Prokuroria e Tiranës njoftoi sot se në përfundim të hetimit për vrasjen e Aurelio Dervishit, pas sherrit të nisur për një vajzë në kryeqytet, ka çuar në gjyq 4 të rinj, të dyshuar si autorë të krimit të ndodhur rreth 5 muaj më parë në Sauk.

Bëhet fjalë për shtetasit Sh.H., F.Sh., B.Sh dhe I.I për veprën penale “vrasje me dashje e kryer në bashkëpunim”, e parashikuar nga neni 76-25 i Kodit Penal.

“Nga hetimet rezultoi e provuar se rreth orës 20:45, të 31 marsit 2024, personat e arrestuar kanë parë duke lëvizur mjetin tip ‘Audi’ me të cilin lëvizte viktima, shtetasi A.D., me miqtë e tij dhe një vajzë që dyshohet se kishte pasur lidhje me parë më një nga bashkëpunëtorët në vrasje shtetasin F.Sh.

Për shkak të xhelozisë, e duke menduar se po qeshnin me të, shtetasi F.Sh. i ndoqi nga pas me makinë duke i prerë rrugën. Në grindje e sipër, ai ka kërkuar nga shoku i tij, shtetasi Sh.H., të nxjerrë thikën dhe të qëllojë viktimën. Ndërsa bashkëpunëtorët e tjerë janë rrahur me grushte me viktimën dhe shokët e tij”, thuhet në dosjen hetimore.

Nga kryerja e ekspertimit mjeko-ligjor rezultoi se viktima, shtetasi A.D. humbi jetën si pasojë e shokut hemorragjik traumatik nga plaga e marë në kraharor.

“Nga analiza e të dhënave të administruara, rezultoi e provuar se nga shtetasit Sh.H., F.Sh., B.Sh dhe I.I. kanë konsumuar elementet e figurës së Veprës Penale ‘Vrasje me dashje e kryer në bashkëpunim’ në dëm të të ndjerit A.D. Këta persona me dashje, në bashkëpunim me njëri-tjetrin kanë kryer veprime aktive të kundraligjshme që konsistojnë në goditjen me sende të forta dhe me thikë”, tha Prokuroria. /ZOOM.AL/