zoom

Aktualitet

U vra dhe u muros nga i dashuri, detaje të reja për vdekjen e 22-vjeçares shqiptare në Spanjë

Detaje të reja kanë dalë në dritë nga vdekja e 22-vjeçares shqiptare, Sibora Gagani.

E reja që jetonte në Itali, ishte larguar drejt Spanjës me të dashurin e saj, italianin Marco Gaio Romeo. Sibora u zhduk në Korrik të 2014-s, pa lënë gjurmë e pa marrë asnjë nga shtëpia ku jetonte me partnerin e saj, në Torremolinos.

Për vite me radhë familja e së resë u përpoq të mësonte për fatin e saj, por pa sukses. Dosja për zhdukjen e Siborës mbeti e pazbardhur, ndërsa rasti u trajtua edhe në programin italian “Chi l‘ha visto?”. E teksa shpresat për të mësuar mbi fatin e saj veniteshin çdo ditë e më shumë, një ngjarje e rëndë e ndodhur më 17 Maj, në Torremolinos të Spanjës, do të ndryshonte rrjedhën e kësaj historie.

Një 28-vjeçare u masakrua me thikë nga partneri i saj, i cili u arrestua nga policia si autor i dyshuar i ngjarjes së rëndë. Lajmi do të trondiste jo pak nënën e Siborës, Elisabetën. Autori i dyshuar ishte pikërisht Marco Gaio Romeo, personi që nëna e shqiptares kishte dyshuar që prej fillimit.

Por kthesa më e madhe në këtë histori ndodhi kur vetë 45-vjeçari, teksa shoqërohej nga efektivët në korridoret e stacionit të policisë, pa një foto të afishuar në mur, kur shfaqej Sibora. Papritur ai bëri rrëfimin monstruoz: Siborën e kam vrarë unë dhe trupin e kam varrosur në muret e shtëpisë ku jetonim.

Një deklaratë e cila mbetet ende për t’u zyrtarizuar para hetuesve, por që mjaftoi që autoritetet në Spanjë të urdhëronin kontroll në shtëpinë në fjalë, me qëllim gjetjen e trupit të së resë. Dy kontrollet e ushtruara javën e shkuar ishin pa sukses. Hetuesit nuk mundën të gjenin asgjë në këtë banesë. Megjithatë deklarata e tij ka rivënë në lëvizje autoritetet në Spanjë dhe hetimet aktualisht vijojnë.

Të gjitha këto zhvillime bënë bujë si në Spanjë, ashtu sikurse edhe në Itali, aty ku ndodhet dhe familja e 22-vjeçares. Programi “Chi l‘ha visto?” riktheu sërish në vëmendje rastin e zhdukjes së saj dhe mori një prononcim edhe të Elisabetës.

Kjo e fundit pranoi se ishte tejet e revoltuar sepse pas zhdukjes së të bijës kishte denoncuar shumë herë pikërisht të dashurin e Siborës, por nuk ishte dëgjuar asnjëherë nga autoritetet kompetente.

Duket se Sibora donte të ndahej nga Marco e për këtë arsye ai e vrau. Të paktën kështu pretendon nëna e 22-vjeçares, një mendim i saj që tashmë bëhet më i gjallë se kurrë pas rrëfimit që ai pati për autoritetet spanjolle. Elisabeta mësoi për vrasjen e të dashurës së tij aktuale, Paula, nëpërmjet një mesazhi nga ish-punëdhënësi i së bijës.

Lajmi për vrasjen e 28-vjeçares erdhi menjëherë edhe tek shoqet e Siborës, që u shprehën: “Pas 9 vitesh nga zhdukja e saj gjëja e parë që mendon është se bëhet fjalë për të. Menduam mos ishte Sibora”.

E përshkruar si një vajzë e qeshur, e shkathët dhe e dashur nga të gjithë, kujtimi më i bukur që ato kanë për të renë është buzëqeshja e saj.

“Prej 9 vitesh nuk e shoh, nuk e dëgjoj, është diçka që nuk ia uroj askujt. Në atë kohë nuk isha dakord për lidhjen e tyre, dhe i thoja: Je lidhur me babain tënd?”, tha Elisabeta, duke sjellë në vëmendje se Marco ishte shumë më i madh në moshë se e bija.

Në atë kohë, Sibora ishte e vetmja që punonte, e duke qenë se nuk po gjente punë, Marco i propozoi që të shkonin të jetonin në Spanjë. Pasi ishte vendosur atje, nëna e 22-vjeçares shkoi për vizitë për disa ditë dhe ajo që pa nuk i pëlqeu.

“Ziheshin shumë keq, edhe para meje. Ai ishte një burrë obsesiv, e donte me forcë. E tradhtonte, por ishte xheloz për të. Nëse mbyllte telefonin, ai nuk reshte së rëni”.

Nëna e shqiptares kujton se në atë kohë, Sibora i kishte thënë: “Nëse e le, do të duhet të zhdukem, në mos nuk do më lejojë”.

Në fund të 2013-s, e reja u rikthye në Itali për disa muaj, më pas Marco erdhi në Romë dhe e bindi që të rikthehej në Spanjë. E jo vetëm kaq, pasi kishin folur për ndarje, donin të martoheshin dhe e gjitha kjo në harkun kohor të pak ditëve.

“Hera e fundit që fola, në fund të Korrikut, më tha se donte ta linte, sepse nuk është njeri normal. Të betohem kjo është hera e fundit, më tha, dhe në fakt ishte e fundit”.

Sibora ndërroi edhe numrin e telefonit dhe pak ditë më pas, nëna e saj Elisabeta mori një telefonatë të papritur: “Përshëndetje Elisabeta, a është tek ju Sibora? Prej dy ditësh jemi zënë dhe nuk është rikthyer më”. Ishte Marco Romeo.

“Herën e parë më tha se Sibora ishte larguar pa marrë rroba me vete, më pas u zbulua që dikush e kishte parë të largohej me valixhe. Romeo mendonte se po e fshihja në Itali”.

Mediat italiane shkruajnë se për zhdukjen e të dashurës së tij ai nuk bëri kurrë denoncim, e të gjitha rrobat e sendet e së resë u gjetën në shtëpinë ku jetonin bashkë. Pas asaj që i ndodhi Paulas, Elisabeta thotë se ka humbur çdo shpresë për të gjetur të bijën gjallë: “Mendoj se vajza ime, 99 përqind është e vdekur, edhe pse shpresoj që arriti të arratisej nga ai vrasës”.