Kompania private fton blerësit që, nëse blejnë një pajisje elektroshtëpiake në periudhën 19-29 Maj 2023, ata mund të marrin dhuratë një pajisje tjetër me të njëjtin çmim.

Por, a është vërtetë kështu? “Boldnews.al” ka siguruar të dhëna të brendshme të kompanisë “Globe Shops”, në të cilat rezulton se çmimet e elektroshtëpiakeve janë rritur ndjeshëm vetëm tre ditë para se të niste fushata promocionale, krahasuar me vlerën që ato kanë pasur në dyqane para nisjes së ofertës.

Redaksia kërkon një koment nga “Dyqanet Globe”, por deri në publikimin e këtij shkrimi nuk u dha asnjë sqarim se përse ishte ndërmarrë rritja e çmimeve të pajisjeve elektroshtëpiake të përfshira në ofertë dhe a përbën sjellja e kompanisë shkelje të ligjit “Për Mbrojtjen e Konsumatorit” dhe ligjit për Konkurencën.

Skandali

Në fillim të muajit Maj, rrjeti i dyqaneve “Globe” prezantoi fushatën: “Bli një produkt” dhe për atë vlerë merr dhuratë ç’të duash dhe sa të duash”. Sipas fletë-palosjeve promocionale, kjo ofertë është e vlefshme vetëm për blerjen e pajisjeve elektroshtëpiake dhe ajo shtrihet në periudhën 19-29 maj.

Në sistemin e brendshëm të kompanisë rezulton se çmimet që gjenden në ofertë janë rritur nga 25-50 përqind nga ai normali që ishte para nisjes së ofertës.

Në vijim, janë disa nga rastet e rritjes së çmimit.

– Frigorifer Whirpool ARG 585 Çmimi i vjetër – 62.400 lekë Çmimi i ri – 82.990 lekë

– Frigorifer Samsung RB 38T Çmimi i vjetër – 97.490 lekë Çmimi i ri – 129.990 lekë

– Frigoerifer Liebherr UIK Çmimi i vjetër – 89.990 lekë Çmimi i ri – 119.990 lekë

– Lavatriçe Samsung WW11 Çmimi i vjetër – 82.490 lekë Çmimi i ri – 109.990 lekë

– Lavatriçe Hisense WFQA Çmimi i vjetër – 49.490 lekë Çmimi i ri – 65.590 lekë

Në të njëjtën mënyrë konstatohet rritje e menjëhershme çmimesh për thuajse të gjithë pajisjet elektroshtëpiake që janë përfshirë në ofertën e “Globe”.

A është normale kjo sjellje?

Nëse ky rast nuk përbën evasion fiskal, më së paku duket se është në kundërvënie me ligjin “Për Mbrojtjen e Konsumatorit”.

Ky ligj, i miratuar në vitin 2008 dhe i ndryshuar disa herë ndër vite, ka të parashikuar detyrime specifike për kompanitë që të mos abuzojnë me konsumatorin.

Në nenin 13 të këtij ligjit thuhet, ndër të tjera, se konsiderohet “Një praktikë tregtare e padrejtë kur: dobëson ndjeshëm aftësinë e konsumatorit për marrjen e një vendimi, si pasojë e informacionit të dhënë, duke shkaktuar kështu marrjen e vendimit, të cilin, në të kundërt, nuk do ta kishte marrë”.

Po ashtu, në nenin 14 të ligjit thuhet, ndër të tjera, se: “Një praktikë tregtare është çorientuese edhe kur, në çfarëdo mënyre, përfshirë paraqitjen e përgjithshme, mashtron apo ka mundësi të mashtrojë konsumatorin mesatar, duke e bërë ose ka mundësi ta bëjë atë, të marrë një vendim, të cilin, në të kundërt, nuk do ta kishte marrë, edhe kur informacioni është bazuar në fakte të vërteta për një ose më shumë prej elementeve të mëposhtme: çmimi ose mënyra e llogaritjes së tij apo ekzistenca e një përfitimi specifik në çmim”.

Neni 17 i të njëjtit ligj konsideron “praktikë tregtare agresive” rastet e “Krijimit të përshtypjes së gabuar se konsumatori ka fituar, do të fitojë ose do të fitojë nëse kryen një veprim të caktuar një çmim apo përfitim tjetër të njëvlershëm, kur në fakt: nuk ka asnjë çmim apo përfitim tjetër të njëvlershëm”.

Nga ana tjetër, ndjekja e praktikave “mashtruese”, “abuzive” apo “çorientuese” cënon drejtëpërdrejtë edhe konkurencën në treg, pasi orienton konsumatorët drejt produkteve apo kompanive tregtare të caktuara.

“Heshtja” e Globe

“Boldnews.al” kontaktoi nëpërmjet e-mail me kompaninë “Globe Shops”, ku i kërkoi koment nëse “është e vërtetë që kompania “Globe” ka ndryshuar (rritur) çmimet e pajisjeve elektroshtëpiake të përfshira në ofertën e sipërcituar, vetëm pak ditë para nisjes së fushatës publicitare”?

Dhe, nëse kjo është e vërtetë, “për cilën arsye është realizuar rritja e çmimeve të pajisjeve elektroshtëpiake para fushatës publicitare? A është kjo sjellje e kompanisë “Globe” në përputhje me Ligjin nr. 9902, dt. 17.04.2008 “Për mbrojtjen e Konsumatorit”, e më specifikisht me nenet 13, 14, 17? Dhe a është kjo sjellje në përputhje me parashikimet e ligjit nr. 9121, dt. 28.07.2003 “Për mbrojtjen e Konkurencës”?

Deri në publikimin e këtij shkrimi, “Dyqanet Globe” nuk i janë përgjigjur interesimit të redaksisë./Boldnews