zoom

Aktualitet

Shqipëria, në fund të listës së vaksinimeve! Rama: Në 7 ditë jemi më mirë

Vaksinimi po ecën me shpejtësi pothuajse në të gjithë botën dhe po shihet si mjeti më i mirë për të kufizuar përhapjen e Covid-19 dhe për t’i dhënë pak frymëmarrje ekonomisë globale e turizmit.

Sipas të dhënave nga “Worldindata”, të përpunuara nga “Monitor”, në botë deri tani më mirë ka ecur Izraeli, ku 60% e popullsisë ka marrë të paktën një vaksinë deri në fund të muajit mars, i ndjekur nga Mbretëria e Bashkuar (46%), Kili (36%), Bahrejni dhe SHBA me nga rreth 30% secili.

Mesatarja e Europës është rreth 13%, ndërsa ajo globale 4.4%. Në Europë vijon të kryesojë Mbretëria e Bashkuar, që e ka vaksinuar me një dozë pothuajse gjysmën e popullsisë.

Me ritme të shpejta ka ecur Hungaria, që ka kaluar e dyta në Europë, duke vaksinuar 22.3% të popullsisë të paktën me një dozë, deri në datën 1 prill. Pas Hungarisë vjen Serbia, që ka zbritur në vendin e tretë, me 21% të popullsisë. Vendet e tjera të Europës kanë vaksinuar të paktën 13.4% të popullsisë (Austria) dhe më pas Danimarka, 11.6%.

Nga shtetet fqinje, Greqia ka arritur të vaksinojë të paktën me një dozë rreth 11% të popullsisë, ndërsa Italia gati 12%. Për Shqipërinë, të dhënat e “Worldindata” nuk janë përditësuar që nga 24 shkurti.

Por, pas përshpejtimit të procesit dhe mbërritjes së vaksinave kineze, Ministria e Shëndetësisë bëri të ditur se janë administruar gjithsej 170 mijë doza vaksina (pjesa më e madhe kanë marrë dorën e parë), ose rreth 5-6% e popullsisë, duke mbetur në listën e vendeve të Europës që kanë administruar më pak doza në raport me popullsisë.

Gjithsesi, Shqipëria është më mirë se vendet e tjera të rajonit, si Kosova apo Maqedonia, ndërsa nuk ka të dhëna për ecurinë e procesit në BosnjëHercegovinë.

EFEKTIVITETI I VAKSINËS

Për shkak të kohës së shpejtë që u zhvilluan dhe administrimit me urgjencë të llojeve të ndryshme nga pjesa më e madhe e vendeve, efikasiteti i vaksinave është i vështirë për t’u matur në këto momente.

Gjithsesi, vendet që kanë ecur më mirë me procesin, si Izraeli dhe Mbretëria e Bashkuar, kanë lehtësuar masat kufizuese pasi panë rënie të infektimeve dhe vdekjeve nga virusi.

Sipas mediave në SHBA, në provën në shkallë të gjerë, vaksina “Pfizer-BioNTech” u tregua se parandalonte 95% të simptomave të COVID-19, vetëm 1 pikë përqindje më shumë se “Moderna”.

Të dyja vaksinat duket se janë njësoj mbrojtëse në të gjitha grupmoshat dhe grupet racore dhe etnike.

Vaksina “Johnoson&Johnson” u tregua se ishte 72% efektive në sëmundjen mesatare deri të rëndë dhe 85% efektive në parandalimin e sëmundjes më të rëndë. Vaksina “AstraZeneca”- Oxford ishte 76% efektive në parandalimin simptomatik COVID-19 dy javë pas dozës së dytë dhe ishte 100% efektive në ndalimin e sëmundjes së rëndë dhe shtrimin në spital në një provë klinike me bazë në ShBA, sipas kompanisë.

Më pak informacion ka për vaksinën kineze, e cila po përdoret masivisht në Shqipëri.

Nga vendet që e kanë përdorur, Turqia ka raportuar për një efektivitet mbi 80%, ndërsa shtete të tjera si Kili e Brazili për një normë më të ulët, pak mbi 50%.

RAMA

Ndërsa kryeministri Rama thotë se Shqipëria ka rritur ritmin me vaksinimit, duke iu referuar grafikut për vaksinat për 100 banorë në 7 ditët e fundit.

“Ne do ta fitojmë këtë luftë me lidership, organizim, këmbëngulje e durim të madh dhe përmes vaksinimit të pandalur masiv, do të kemi një sezon turistik të lehtësuar ndjeshëm.

*të dhënat e barometrit global për ritmin e vaksinimit 7 ditët e fundit”, shkruan Rama.

Sipas të dhënave nga “Worldindata”, të përpunuara nga “Monitor”, në botë deri tani më mirë me procesin e vaksinimit ka ecur Izraeli, ku 60% e popullsisë ka marrë të paktën një vaksinë deri në fund të muajit mars, i ndjekur nga Mbretëria e Bashkuar (46%), Kili (36%), Bahrejni dhe SHBA me nga rreth 30% secili.