Shehaj tha se pavarësisht asaj që thuhet, PD nuk është në pushtet, që do të thotë se ka humbur.

“Kuptohet që ka pasur blerje votash më 25 prill, por pavarësisht gjithçkaje ne kemi një problem me të vërtetën. Duhet t´i themi të vërtetën qytetarëve. Çfarë duhet të bëjmë sot e në vazhdim, a do t´i marrim mandatet e deputetëve dhe a do të hyjmë në Kuvend? Të tjerat që thuhet janë lojra për të shmangur përgjegjësitë”, tha Shehaj.

I pyetur lidhur me shpalljen “non grata” të ish-Kryeministrit Sali Berisha nga SHBA, Shehaj tha se “nuk mund të komentonte një vendim politik të SHBA, përderisa nuk ka një dosje apo një dokumentacion publik”.

Lidhur me akuzat dhe sulmet mbi takimin që ai ka pasur me ambasadoren e SHBA, Yuri Kim, Shehaj tha se “ata që ndërmorën sulmet janë jashtë PD, por janë stafe që punojnë për Lulzim Bashën.

“Për mua shqetësimi më fondamental është e ardhmja e PD-së, si do fitojmë zgjedhjet e ardhshme. Për të justifikuar humbjen ne po u themi se nuk mund të fitojmë ndaj Edi Ramës”, tha Shehaj.

Në emisionin Opinion, kandidati për kryetar i PD-së, tha se “mënyra për të mundur Edi Ramën është për të denoncuar korrupsionin, lufta kundër korrupsionit dhe oligarkisë, që ka zaptuar ekonominë. Korrupsioni është problemi që ka Shqipëria për 30 vjet, kjo është kauza e shqiptarëve, ndaj dhe ne duhet ta bëjmë kauzën tonë”.

Sipas Shehajt, PD duhet të punojë mbi ndëshkueshmërinë e të korruptuarve.

“Ne duhet të bëhemi të besueshëm për shqiptarët. Lufta kundër korrupsionit është një çështje praktike, ekonomike, por që i duhet shqiptarëve.

Shikoni të gjitha analizat që bëhen, sa më shumë i korruptuar të jetë një vend, aq më i varfër është”, tha Shehaj.

I pyetur se çfarë do të bënte ndryshe në drejtimin e PD, Shehaj tha se “ka besimin e demokratëve, jam njeri i pakorruptueshëm, që di të zgjidh problemin që kanë shqiptarët sot, që është papunësia”.

“Pjesa më e madhe e Presidentëve të SHBA janë sipërmarrës, vijnë nga Bota e biznesit. Nëse ju mendoni se kush është i sukseshëm në biznes nuk është i sukseshëm në politikë e keni gabim”, tha Shehaj, gjatë debatit me gazetarët në emisionin Opinion.

Ai tha se Shqipërisë i duhet një Kryeministër i ndershëm, mbi të gjitha.