Deputeti i PS, Sadi Vorpsi deklaron se nuk do të jetë më deputet, pas zgjedhjeve të Prillit. Ai e njoftoi vendimin në një postim në rrjetet sociale. Ai thotë se si motiv është vendimi për t’u hapur rrugë të rinjve, por kjo arsye ngre disa pikëpyetje. Sadi Vorpsi ka qenë aktiv deri sot në Tiranë në fushatën elektorale të PS, por ai mund të mos letë lënë në vendet e sigurta në listën e kandidatëve për deputetë. PS duhet t’i dërgojë deri të hënën listat dhe me gjasë ato janë përpiluar. Në listë do të ketë edhe emra jashtë politikës, si Luljeta Bozo apo Najada Como që u prezantuan këtë javë nga Rama. Futja e këtyre emrave duhet ta ketë spostuar Vorpsin poshtë vijës fituese. Tirana ka 36 deputetë dhe PS mori 18 deputetë në zgjedhjet e fundit.
Megjithatë Vorpsi bëri këtë sqarim, që Zoom.al po e poston të plotë.
“Të nderuar miq, mbështetës e dashamirës!
Pas 4 vitesh kontribut si Prefekt i Qarkut Tiranë dhe 4 vitesh si deputet i Partisë Socialiste, kam vendosur t’ia kaloj stafetën prurjeve të reja për t’u fokusuar më shumë tek familja ime dhe në angazhime të tjera private. T’i sherbeja vendit dhe qytetit tim ka qenë nder dhe privilegj i jetës sime.
Partia Socialiste është jo vetëm shtëpia më e madhe politike, por dhe më përparimtarja e gjithëpërfshirësja. Edi Rama e transformoi nga një parti në opozitë të vështirë, në forcën vendimtare për qeverisjen dhe modernizimin e vendit.
Kam shijuar çdo moment përfaqesimin e komuniteve nga zemra e Tiranës, e më pas në Vorë e në Farkë dhe jam krenar për gjithçka kemi arritur së bashku.
Edhe pse nuk do të kandidoj sërish, do të jem po aq aktiv në fushatën e 25 Prilllit për mandatin e domosdoshëm të PS dhe Edi Ramës për t’i çuar gjer në fund punët e nisura e për ta bërë Shqipërinë zonjë.
Ju falenderoj nga thellësia e zemrës për të gjithë mbështetjen dhe mezi pres të bashkojmë forcat për fitoren e 25 Prillit. Juaji gjithmonë, Sadi”.
Të lidhura
