BKT (Banka Kombëtare Tregtare) dhe Raiffeisen Bank nuk pranuan të japin të dhënat e kërkuara për zëvendëskryeministrin e kohës, Arben Ahmetaj, ish –ministrin e Energjisë, Damian Gjiknuri, kryetarin e Bashkisë së Tiranës, Erion Veliaj, ish –Ministrin Lefter Koka, Alqi dhe Edmond Bllakon dhe pronarët e kompanive të inceneratorëve.

Zoom.al ka mësuar se disa banka të nivelit të dytë u kanë dhënë kredi këtyre kompanive duke pranuar si kolateral impiantet, të cilat, në bazë të kontratës, do të kalonin si pasuri shtetërore në përfundim të shfrytëzimit nga koncesionari.

Redaksia jonë iu drejtua me disa pyetje për këtë çështje një prej bankave që përflitet se u ka dhënë miliona euro kredi atyre, në kohën kur ndaj “Integrated Technology Service”, “Integratet Technology Waste Treatement Fier” dhe “Albtek Energy” SPAK kishte nisur hetimet për abuzim me fondet publike dhe korrupsion të zyrtarëve të lartë.

Ashtu si me Komisionin Hetimor Parlamentar, Raiffeisen Bank refuzoi edhe kërkesën e Zoom.al për bërë transparencën nëse ka dhënë kredi për kompani private që kanë lënë kolateral asete shtetërore, çfarë kanë vendosur si kolateral dhe nëse i kanë paguar rregullisht këstet e kredive.

Çështja konsiderohet si me interes të lartë publik, pasi në rast të mosshlyerjes së kredisë, bankat do t’i sekuestronin këto pasuri shtetërore, të ngritura me paratë e taksapaguesve shqiptarë.

Raiffeisen Bank nuk e mohoi në asnjë rast që të ketë dhënë kredi për kompanitë e inceneratorëve, por shpjegoi se të dhënat përbënin sekret bankar dhe nuk mund t’i bënte ato publike.

“Informacioni i kërkuar nga ana juaj në lidhje me të dhënat financiare të klientëve të saj, kontratat që kanë lidhur me bankën, pagesat e kryera etj. përbën sekret bankar dhe për këtë arsye banka nuk mund ta trajtojë informacionin pa pëlqimin e klientit” -thuhet në përgjigjen e Raiffeisen Bank për Zoom.al.

Klienti i Raiffeisen Bank në këtë rast është në kërkim ndërkombëtar dhe rënia dakord për të bërë publike një çështje me interes publik duket e pamundur.

Në janar të këtij viti, një tjetër bankë e nivelit të dytë bllokoi llogaritë e inceneratorëve të Fierit dhe Elbasanit. Llogaritë e “Integratet Technology Waste Treatement Fier” u bllokuan për shkak të një overdrafti, ndërsa kontrata e inceneratorit të Elbasanit ishte lënë peng nga “Albtek Energy” për 4.7 milionë dollarë.

Pronarëve të inceneratorëve nuk u kanë mjaftuar 60 milionë eurot që ka paguar deri tani buxheti i shtetit për dy inceneratorët po kanë përdorur edhe kontratat koncesionare për të marrë kredi.

Ajo që mbetet për t’u sqaruar është se si këto banka u kanë dhënë kredi këtyre kompanive në një kohë që ato ishin nën hetim dhe si e ka lejuar shteti që kompanitë të lënë peng në banka asetet që janë pasuri shtetërore. /Zoom.al