Qeveria synon që të përfshijë në skemën e tatimit të ardhurat e siguruara nga kriptovalutat, duke filluar prej muajit janar të vitit të ardhshëm.
Ndryshimet e propozuara në ligjin për tatimin e të ardhurave shtohet termi “mjet virtual”. Sipas përcaktimit në këtë projektligj, “mjeti virtual” nënkupton një pasqyrim digjital të një vlere që mund të depozitohet, të tregtohet, apo të transferohet në formë digjitale, si dhe që mund të përdoret për qëllime pagesash, ose investimesh, apo si mjet shkëmbimi, duke përfshirë, por pa u kufizuar te kriptomonedhat.
Në këtë përkufizim nuk përfshihen pasqyrimet digjitale të monedhave të njohura zyrtarisht si të nxjerra, ose të garantuara nga bankat qendrore, ose një autoritet publik, të letrave me vlerë dhe mjeteve të tjera financiare që janë parashikuar nga legjislacioni në fuqi.
Ndryshimet në ligjin e tatimit të të ardhurave synojnë që të reflektojnë ligjin e miratuar në 2020 nga Kuvendi për licencimin e kriptovalutave dhe aktivitetit të prodhimit të tyre.
Por, megjithëse ligji ka hyrë në fuqi dhe bashkë me të edhe rregulloret përkatëse, deri më tani nuk ka asnjë subjekt të licencuar për ushtrimin e këtij aktiviteti, që do të thotë se nëse ligji për tatimin e të ardhurave i propozuar në këtë formë do të hynte në fuqi, ai s’ka çfarë të tatojë, pasi s’ka subjekte.
Këtë fakt e pranoi edhe Autoriteti i Mbikëqyrjes Financiare gjatë raportimit vjetor në Kuvend në fillim të muajit maj. Gjatë raportimit të kreut të AMF-së para Komisionit të Ekonomisë, deputeti socialist, Erion Braçe ngriti shqetësimin se tregu i zi i kriptomonedhave po lulëzon me para kriminale.
“Nuk është marrë asnjë licencë, ndërkohë që tregu i zi në asetet virtuale po lulëzon. Në këtë fushë ka marrë përmasa, është bërë i madh dhe i prin paraja e krimit të organizuar, korrupsioni vjen më poshtë”, deklaroi Braçe.
Nëse nuk ndërhyhet, sipas Braçes, vendi rrezikon që të përsërisë një krizë të ngjashme financiare si ajo e piramidave në mes të viteve ’90.
“Në atë kohë një copë letër kishte nga Banka e Shqipërisë, që thoshte se tregu ishte i palicencuar, ndërkohë që bankat kishin hyrë me kohë në tregun e palicencuar të fajdeve në 1995-1996. Duhet të jemi shumë aktivë në pjesën e licencimit se prandaj është bërë ligji. Duhet të jeni agresiv në këtë pjesë për të ftuar ata që janë avantgardë në këtë aktivitet. Agresivë edhe në pjesën e denoncimit”, deklaroi Braçe.
Të lidhura
