Pavarësisht se qeveria shqiptare humbi përfundimisht gjyqin me Françesko Beketin, ish-prokurorja Antoneta Sevdari e cila ngriti akuzat ndaj tij vijon të shprehet e bindur se biznesmeni Italian ka konsumuar veprat penale për të cilat është akuzuar në Shqipëri.
Në një prononcim për MCN, Sevdari sqaron se në këtë përfundim ka dalë pas një pune të madhe, duke mos kursyer edhe etiketimet për ish-pronarin e Agon Channel.
“Unë vazhdoj të këmbëngul se kam ngritur akuza të drejta! Jam tërësisht e bindur dhe çdo gjë e kam bazuar vetëm në një punë të jashtëzakonshme me shumë përkushtim! Që ai është hajdut ndërkombëtar, e di gjithë bota!”
Beketi kishte kërkuar 650 milionë euro dëmshpërblim, pasi prokuroria shqiptare sekuestroi pronat e biznesmenit italian, përkatësisht televizionin Agon Channel.
Gjithçka nisi pas deklaratave të kryeministrit Rama, i cili pati akuzuar publikisht Beketin për pastrim parash.
Hetimin e çështjes e mori në dorë Antoneta Sevdari.
Tashmë ajo është përjashtuar nga sistemi, edhe pse kaloi shkallën e parë të vetingut.
Shkak për këtë u bë pasuria e pajustifikuar e bashkëshortit të saj.
Kolegji i Posaçëm i Apelimit e shkarkoi, ndonëse ajo ishte zgjedhur si anëtare e Këshillit të Lartë të Prokurorisë.
Të lidhura
