Për të katërtin vit radhazi oqeanet në mbarë botën janë më të ngrohta se viti paraardhës, ku shkak është kriza klimaterike e shkaktuar nga njerëzit që pompojnë gazrat që bllokojnë nxehtësinë në atmosferë.

Studimi i një ekipi shkencëtarësh zbuloi se pesë vitet më të nxehta për oqeanet kanë ndodhur të gjitha në gjashtë vitet e fundit dhe se shpejtësia me të cilën po ngrohen oqeanet po bëhet gjithnjë e më e shpejtë.

Studimi ka shqyrtuar temperaturat nga sipërfaqja e oqeanit deri në 2,000 metra thellësi dhe rezultatet janë shqetësuese.

“Gjendja e oqeaneve tona mund të masë shëndetin e botës dhe duke gjykuar nga vëzhgimet e përditësuara të oqeanit … ne kemi nevojë për ndihmë”, kanë deklaruar shkencëtarët.

Për sa i përket energjisë, sasia e nxehtësisë e shtuar në oqeane në vitin 2022 është e barabartë me 100 herë më shumë se gjenerimi total global i energjisë elektrike vitin e kaluar.

Oqeanet shërbejnë si një tregues i mirë i ndikimit real të ndryshimeve klimatike, sepse krahasuar me temperaturat e ajrit, ato ndikohen më pak nga ndryshimet sezonale dhe ciklet e motit të përditshëm. Duke mbuluar pothuajse tre të katërtat e sipërfaqes së Tokës, oqeanet thithin shumicën dërrmuese të nxehtësisë së botës. Që nga viti 1970, më shumë se 90% e nxehtësisë së tepërt të planetit ka shkuar në oqeane.

Shkencëtarët janë shprehur se tendenca e ngrohjes afatgjatë globale është tani aq e qëndrueshme dhe e fuqishme sa që rekordet vjetore vazhdojnë të vendosen çdo vit.