Gazeta greke ndër të tjera shkruan se qeveria greke nuk mund ta ndalojë vizitën e kryeministrit shqiptar.

“Çështja nuk është dypalëshe, është evropiane, pavarësisht atyre që pretendojnë se është një çështje që ka të bëjë vetëm me pakicën kombëtare greke. Bëhet fjalë për shtetin e së drejtës dhe mënyrën sesi Shqipëria i trajton minoritetet, ka të bëjë me mënyrën se si funksionon gjyqësori shqiptar. Qeveria greke do të vazhdojë të ngrejë këto çështje”, tha Mitsotakis.

Nga të dhënat e deritanishme, SEF (stadiumi i paqes dhe i miqësisë) duket se është vendi më i mundshëm për Edi Ramën, pasi ka pasur negociata intensive mes ambasadës shqiptare në Athinë dhe drejtuesve të sallës së lojërave ku mund të mbajë fjalimin kreu i qeverisë shqiptare, raporton media greke. Mirëpo, sipas gazetës greke ka munguar edhe një ofertë financiare për përdorimin e pallatit të sportit.

Qeveria greke do të donte të shmangte imazhin e një “feste” në një ambient ​​të hapur, duke qenë se skenarë qarkullonin edhe për sheshin Sintagma. “Kryeministri shqiptar Edi Rama deri tani nuk ka gjetur vend për tubimin e 12 majit“, shkruan “Protothema”, duke theksuar se edhe salla e Teatrit të Krishtlindjeve në Galat, është përjashtuar si mundësi.

“E vetmja marrëveshje që ata bënë ishte për sallën Melina Merkuri, e cila ka një kapacitet të vogël, nën 1000 persona, ndërkohë që në fakt duan një hapësirë ​​të madhe që mund të mbajë 4000 deri në 5000 persona”, vijon Protothema.

“Ata kërkuan verbalisht stadiumin e Olympiacos, por nuk e bënë kërkesën me shkrim. Nuk dihet nëse kjo kërkesë do të miratohet”, vijon më tej artikulli i medias greke. /ZOOM.AL/