zoom

Aktualitet

Kush janë dy kryebashkiakët që do çojë Rama në SPAK?

Pak javë më parë kryeministri Edi Rama teksa sulmonte Prokurorinë e Posaçme, paralajmëroi edhe dy nga të zgjedhurit e vetë në pushtetin vendor se do t’i denonconte për korrupsion.

Ai nuk bëri të ditur asgjë tjetër, ndërsa nisën aludimet se cilët ishin kryebashkiakët që do të denonconte vetë në SPAK.

Kësaj dileme i dha një farë qartësie ministri i Drejtësisë, Ulsi Manja, i cili në një dalje të posaçme për mediat, teksa bëri të ditur se kishte çuar në SPAK ish-drejtoreshën e Agjencisë së Trajtimit të Pronave, tha se për të njëjtën çështje po hetoheshin edhe dy kryebashkiak në zonat bregdetare.

Pra një e dhënë kjo që e kufizoi edhe më shumë rrethin e kryebashkiakëve që do të denoncohen nga Rama.

Kjo pasi kryebashkiakët që drejtojnë bashki që kanë dalje në det janë vetëm 8, nga të cilët 2 skualifikohen direkt nga kjo listë, pasi janë zgjedhur në këto detyra vetëm pak javë më parë.

Pra bëhet fjalë për bashkitë e Shkodrës dhe Durrësit, të cilat kanë drejtues të rinj.

Pra në listë mbeten kryebashkiakët e Fierit, Divjakës, Lezhës, Vlorës, Himarës dhe Sarandës.

Ai i Lezhës dhe Sarandës me shumë mundësi mbeten sërish jashtë kësaj liste pasi kanë vetëm 3 vjet në detyrë, ndersa per ate te Divjakes nuk ka patur deri me tani ndonje indicie qe mund ta beje pjese te kesaj liste.

Kështu që lista reduktohet në tre emra, konkretisht Armando Subashi i Fierit, Dritan Leli i Vlorës dhe Jorgo Goro i Himarës.

Të tre këta janë emra që, ose janë sulmuar nga Rama, ose që kanë qenë të përfshirë në çështje të hetuara nga SPAK, siç është edhe rasti i Armando Subashit, i cili është marrë edhe në pyetje nga prokuroria për çështjen e Inceneratorëve.

Ndërkohë që sa i përket Lelit të Vlorës, dihen tashmë marrëdhëniet me Ramën.

Ky i fundit nuk ia fali refuzimin që Leli i bëri kërkesës së tij që të dorëzonte mandatin e kryebashkiakut dhe të bëhej deputetë.

Që prej atëherë ai ka qenë shpesh në qendër të sulmeve të socialistëve.

Kongresi i shkuar i socialistëve u duk se solli një ndryshim në raportet mes tyre, por një takim i disa ditëve më parë i Ramës me disa kryebashkiak dhe zyrtar të tjerë i mbajtur në Vlorë dhe ku Leli nuk ishte ftuar, tregoi të kundërtën.

Ndërkohë që edhe Jorgo Goro megjithëse drejton një bashki periferike, ka qenë disa herë në qendër të kritikave të Ramës, madje edhe publikisht.

Kujtojmë këtu një takim të Ramës me kryebashkiakët të mbajtur një vit më parë në kryeministri, ku ai e sulmoi publikisht Goron, madje duke e sjellë Himarën që drejtohet prej tij si shembull të papastërtisë. /Zoom.al