Kësaj proteste pritet që ti bashkohen edhe disa nga deputetët demokratë, të cilët ose janë të rreshtuar në grupimin Basha, që sot drejtohet nga Enkelejd Alibeaj, pas tërheqjes së ish-kreut demokrat, ose kanë preferuar të qëndrojnë neutralë, duke mbajtur një distancë qoftë nga ish-Kryeministri Berisha ashtu edhe nga Alibeaj.

Dhe atë që s´po arrin dot ta bëjë në Kuvend për të bashkuar grupin parlamentar, duket se Berisha mund t´a arrijë përmes protestave, të cilat pritet të mbledhin edhe deputetët demokratë.

Jorida Tabaku, e cila është rreshtuar në krah të grupimit të Alibeajt ka deklaruar se do të marrë pjesë në protestë, duke thënë se të njëjtin qëndrim ka pasur edhe për protesta të thirrura kundër rritjes së çmimeve.

“Unë kam marrë pjesë në çdo protestë qytetare, isha dhe para një jave me 3 femijët. Do te dal në çdo protestë”, tha Tabaku.

Gjithashtu protestës do ti bashkohet edhe deputeti i Lushnjes, Saimir Korreshi, i cili bën pjesë te deputetët që as nuk i është bashkuar Berishës, por as grupimit Basha-Alibeaj.

“Po do marr patjetër, në çdo proteste kundër kësaj qeverie unë do të marr pjesë”, tha ai.

Edhe deputetja Grida Duma, ka deklaruar po ashtu se do të marrë pjesë në protestën e 7 korrikut.

Po kështu pjesëmarrjen në protestë e kanë konfirmuar edhe Tomorr Alizoti, Helidon Bushati dhe Dhurata Çupi.

Pak ditë më parë, Berisha në një tryezë me shoqërinë civile ai zbuloi se PD ka menduar pikërisht këtë datë për protestën e madhe në Tiranë.

“Data 7 korrik është menduar nga PD të jetë data e protestës së madhe në Tiranë.Të bëjmë gjithçka për të nisur betejën tonë, kjo është betejë jashtëzakonisht e rëndësishme.Të bëjmë një punë intensive për suksesin e protestës tonë me 7 korrik dhe të angazhohemi që protesta të tjera do të vazhdojnë. Me këtë sistem nuk pajtohemi. Ky është sistem monist. Ky nuk është më pushtet kushtetues, ky është pushtet i dalë nga patronazhistët.Të ngrihemi në këtë protestë të fuqishme. Nuk mund të nënshtrohemi ne. Nuk mundet kush ta shndërrojë Tiranën në Beogradin e vogël, Tirana është kryeqyteti i kombit”.