Studimet tregojnë se 1 në 10 baballarë luftojnë gjithashtu me depresionin dhe ankthin pas lindjes. Simptomat e tyre dalëngadalë po njihen, diagnostikohen dhe trajtohen më shumë, duke bërë që edhe pediatrit të përfshijnë në ekzaminimet e depresionit pas lindjes edhe baballarët.

Ashtu si gratë, burrat mund të përjetojnë depresion në çdo kohë, përfshirë para lindjes së një fëmije.

Gratë shpesh shfaqin simptoma të depresionit pas lindjes brenda katër deri në gjashtë javë pas lindjes, por shenjat mund të shfaqen deri në tre muaj pas lindjes.

Një meta-analizë e studimeve të vitit 2019 zbuloi se rreziku më i lartë i depresionit gjatë shtatzënisë për baballarët ishte gjatë tremujorit të parë. Studimi tregoi gjithashtu se depresioni pas lindjes ishte më i lartë tek meshkujt kur foshnja ishte 3 deri në 6 muajsh.

Një sërë faktorësh mund të luajnë një rol në zhvillimin e depresionit para lindjes ose pas lindjes së babait, duke përfshirë:

Hormonet: Hulumtimet kanë treguar se baballarët përjetojnë ndryshime hormonale gjatë dhe pas shtatzënisë së partneres së tyre, veçanërisht rënie të testosteronit.

Depresioni i partneres: Gjysma e burrave që kanë një partnere që po kalon në depresion, shfaqin edhe vetë shenja depresioni.

Ndjenja e shkëputjes nga nëna dhe foshnja: Baballarët duan të jenë pjesë e përvojës së të porsalindurit, por shpesh ata ndjehen sikur janë “jashtë”. Nënat mund të mos e kuptojnë gjithmonë se po e përjashtojnë babin nga kujdesi për fëmijën. Ose mund të jenë aq të lidhur me fëmijën sa mund të mos e kuptojnë se edhe babai ka nevojë të kalojë kohë me beben.

Një histori depresioni: çdo histori depresioni ose probleme të tjera psikologjike rrit rrezikun e depresionit prenatal ose pas lindjes.

Përshtatja psikologjike ndaj prindërimit: Të bëhesh prind kërkon aftësi të konsiderueshme përballuese dhe është një “sforcim” i madh psikologjik që jo çdokush mund ta përballojë në mënyrën e duhur.

Mungesa e gjumit: Shumica e prindërve të rinj e nënvlerësojnë rolin që mungesa e gjumit mund të luajë në zhvillimin e simptomave të ankthit dhe depresionit. Ata gjithashtu shpesh nënvlerësojnë se sa janë të privuar nga gjumi.

Faktorë të tjerë që mund të kontribuojnë në depresionin pas lindjes të babait, përfshijnë stresin financiar, problemet në marrëdhënie, shqetësimet që mund të ketë foshnja, apo dhe fakti se baballarët në përgjithësi nuk marrin lejen e lindjes.

Depresioni para lindjes dhe pas lindjes mund të duket ndryshe tek meshkujt sesa tek femrat. Burrat mund të përjetojnë disa simptoma “tradicionale” si lodhje dhe ndryshime në gjumë ose oreks, por ata shpesh shfaqin më pak simptoma të dukshme, të tilla si të qash.

Simptomat e zakonshme për depresionin prenatal ose pas lindjes nga babai përfshijnë:

-Zemërim, shpërthime të papritura ose sjellje të dhunshme

-Shtim i sjelljes impulsive ose fillim i përdorimit të alkoolit apo substancave të tjera.

-Nervozizmi

-Motivim i ulët

-Simptoma fizike si dhimbje koke, dhimbje muskujsh, stomaku ose probleme me tretjen

-Përqendrimi i dobët

-Mendime vetëvrasëse

-Duke punuar shumë më shumë ose shumë më pak

Ankthi është gjithashtu i zakonshëm tek meshkujt gjatë dhe pas shtatzënisë. Një studim i vitit 2021 tregoi se 1 në 10 burra përjetojnë ankth para lindjes dhe pas lindjes. Në popullatën e përgjithshme, afërsisht 14.3 për qind e meshkujve kanë ankth, afërsisht 9 për qind më pak se femrat.