Reuters raporton se me përhapjen e vaksinave, disa qeveri, si ajo e Greqisë dhe Spanjës, po bëjnë presion për një miratim të shpejtë të një certifikate në të gjithë Bashkimin Europian që vërteton se dikush ka marrë dozat e vaksinës, një përpjekje kjo që synon që njerëzit të udhëtojnë sërish.

Sidoqoftë, vende të tjera, të tilla si Franca dhe Gjermania, duket se nuk janë fort dakord me një vendim të tillë, pasi zyrtarët thonë se kjo mund ta bëjë të detyrueshëm vaksinimin dhe do të ishte diskriminues për ata që nuk mund ose nuk do të duan të vaksinohen.

Franca, ku qasja kundër vaksinave është veçanërisht e theksuar dhe ku qeveria është zotuar të mos i bëjë ato të detyrueshme, e konsideron idenë e pasaportave të vaksinave si “të parakohshme”, tha një zyrtar francez.

Një nga pyetjet më të diskutueshme të kohëve të fundit në lidhje me pandeminë e Covid-19 është fakti nëse një kod QR mund të hapë botën, që nënkupton se mund të lirojë udhëtimet ndërkombëtare dhe lëvizjen e njerëzve. Në fillim të muajit, Agjencia ndërkombëtare e lajmeve me seli në Paris, Agence France-Presse, raportoi se përpjekjet globale për të zhvilluar pasaporta dixhitale të vaksinave po zhvillohen në Estoni.

Përpjekjet e deritanishme kanë në qendër kodin QR – një kod i lexueshëm nga makineritë, i përbërë nga një varg katrorësh bardhë e zi, që përdoret zakonisht për ruajtjen e URL-ve. Estonia po bashkëpunon me Organizatën Botërore të Shëndetësisë në një projekt pilot për të parë se si mund të funksionojnë certifikatat elektronike të vaksinave të cilat do të njihen globalisht.

OBSH, për momentin, nuk i rekomandon pasaportat e vaksinimit për udhëtime pasi nuk i sheh ato si garanci të mjaftueshme të mbrojtjes nga transmetimi i virusit. Sidoqoftë, certifikatat dixhitale të vaksinave janë një perspektivë e re, veçanërisht për bizneset e goditura nga pandemia, siç janë linjat ajrore.

Nga ana tjetër, ekspertë po ngrenë pyetje në lidhje me privatësinë dhe të drejtat e njeriut.