zoom

Bota

Çfarë parashikon aneksi i Marrëveshjes Kosovë-Serbi

Pas orëve të gjata negocimi, Kosova dhe Serbia u pajtuan me aneksin e zbatimit të Marrëveshjes për normalizim të marrëdhënieve, që u aprovua me një deklaratë të Bashkimit Evropian. Kurti dhe Vuçiç kishin rënë dakord për planin e BE-së në takimit e 27 shkurtit në Bruksel, por nuk kishin pranuar disa prej pikave të nxehta që lidhen me çështjen e Asociacionit, apo të avancimit të Kosovës në pranimin e organizatave ndërkombëtare.

Pas 12 orë negociatash në Ohër mes Kurtit dhe Vuçiç, me ndërmjetësimin e Borrell dhe Lajçak, Bashkimi Europian publikoi të plotë ankesin e Planit të BE-së, për të cilat palët kanë rëndë dakord, por që nuk kanë hedhur ende një firmë mbi këtë dokument.

Marrëveshja dhe ky aneks po ashtu për palët bëhen pjesë kyçe e proceseve të integrimit.

“Menjëherë pas miratimit të Marrëveshjes dhe këtij Aneksi, lehtësuesja, BE-ja do të nisë procesin për të amandamentuar Kapitullin 35 për Serbinë për të pasqyruar detyrimet e reja të Serbisë që rrjedhin nga Marrëveshja dhe ky Aneks. Agjenda e Grupit Special të Kosovës për Normalizim po ashtu do të reflektojë obligimet e reja të Kosovës që burojnë nga Marrëveshja dhe Aneksi”, thuhet në aneks.

Palët janë dakorduar të miratojnë si çështje urgjente Deklaratën për Personat e Zhdukur, siç është negociuar në dialogun e lehtësuar nga BE-ja.

Gjithashtu specifikohet edhe neni 7 i marrëveshjes bazë për vet menaxhimin e komunitetit serb në Kosovë.

“Për ta implementuar nenin 7, Kosova fillon menjëherë negociatat brenda dialogut të lehtësuar nga BE-ja për të krijuar aranzhime dhe garanci specifike për të siguruar nivel të përshtatshëm të vetëmenaxhimit për komunitetin serb në Kosovë, në përputhje me marrëveshjet e mëparshme përkatëse në dialog, siç përcaktohet nga BE-ja lehtësuese”, thuhet në aneks.

Për të mbikëqyrur zbatimin e aneksit do të themelohet një Komitet i përbashkët Monitorimi 30 ditësh.

Sa i përket nenit 9, të përfitimeve financiare, brenda 150 ditësh mbahet në konferencë donatorësh, por që mjetet nuk disbursohen pa u zbatuar në tërësi aneksi.

Palët po ashtu janë zotuar të implementojnë aneksin pa ndikimin dhe pengimin e njëra tjetrës, derisa aneksi përmbyllet me një paralajmërim për palët në rast moszbatimit që thotë se kjo do ndikojë proceset integruese të tyre.