Deklarata e BE-së shmang premtimet për pranimin e azilkërkuesve, raporton REL.
Mijëra afganë janë larguar ose duan të largohen nga Afganistani, prejse militantët talebanë kanë marrë kontrollin e këtij vendi, më 15 gusht.
“Bazuar në mësimet e nxjerra, BE-ja është e vendosur të veprojë së bashku, për të parandaluar përsëritjen e lëvizjeve të pakontrolluara të migracionit ilegal në shkallë të gjerë”, thuhet në deklaratë.
Ministrat po ashtu thanë se blloku do të preferonte të punonte me fqinjët më të afërt të Afganistanit, në përpjekje “për të forcuar kapacitetet e tyre për të siguruar mbrojtje dhe pritje dinjitoze për refugjatët”.
Talebanët kanë sunduar Afganistanin edhe në periudhën 1996-2001.
Shumë afganë i kanë të freskëta kujtimet e ndëshkimeve të ashpra nga ajo kohë, ekzekutimet masive publike, ndalimin e shkollimit të vajzave e të tjera.
BE-ja tha se mbështetja për afganët mund të sigurohet “në formën e zhvendosjes në baza vullnetare”, duke u dhënë përparësi personave të cenueshëm, siç janë gratë dhe fëmijët.
Komisionari i lartë i Kombeve të Bashkuara për Refugjatë, Filippo Grandi, tha se nuk pret që një numër i madh refugjatësh nga Afganistani të arrijnë në Evropë, nëse atyre që ikin nga vendi u sigurohet ndihmë.