Sipas mediave të huaja, Sara Duterte, vajza e Presidentit të mëparshëm të vendit, Rodrigo Duterte, i njohur për goditjen që i dha grupeve kriminale të drogës, tha se kishte kontraktuar një vrasës për të vrarë presidentin, gruan e tij dhe kryetarin e Dhomës së Përfaqësuesve, nëse ajo vritet.

Duke folur në një konferencë në internet, ajo tha: “Kam biseduar me një person. Unë thashë, nëse më vrasin, shko të vrasësh BBM (pseudonimi i Presidentit të Filipineve Ferdinand “Bongbong” Marcos Jr), Liza Araneta (zonja e parë) dhe Martin Romualdez (kreu i Dhomës së Përfaqësuesve dhe kushëriri i dytë i presidentit).

“Thashë mos ndaloni derisa t’i vrisni dhe më pas ai tha po”, tha ajo më tej.

Ajo po i përgjigjej një komentuesi në internet që i kërkonte të qëndronte e sigurt, kur qëndronte në dhomën e ulët të Kongresit gjatë natës me shefin e saj të kabinetit.

Sipas kodit penal të Filipineve, thirrje të tilla publike mund të përbëjnë një krim dhe dënohen me burg ose gjobë.

Në tetor, zonja Duterte akuzoi presidentin Marcos për paaftësi dhe tha se kishte imagjinuar t’i priste kokën.

Sekretari ekzekutiv i vendit, Lucas Bersamin i përshkroi komentet e saj të fundit si një “kërcënim aktiv” kundër presidentit dhe tha se një forcë elitare e rojeve presidenciale do të përgatitej “për veprime të duhura të menjëhershme”.

“Duke vepruar në bazë të deklaratës së qartë të zëvendëspresidentes, se ajo kishte kontraktuar një vrasës për të vrarë Presidentin, nëse një komplot i supozuar kundër saj arrin sukses, sekretari ekzekutiv ia ka referuar këtë kërcënim aktiv Komandës së Sigurisë Presidenciale për veprime të duhura të menjëhershme,” tha ai në një deklaratë të qeverisë.

Më tej vazhdoi: “Çdo kërcënim për jetën e Presidentit duhet marrë gjithmonë seriozisht, aq më tepër që ky kërcënim është zbuluar publikisht në terma të qartë dhe të caktuar”.

Thirrjet e saj vijnë në një moment përçarjeje midis zonjës Duterte dhe Presidentit Marcos, të cilët të dy vijnë nga familje të fuqishme politike në vendin e Azisë Juglindore.

Filipinet po përgatiten për zgjedhjet afatmesme në maj, me mandatin gjashtëvjeçar të Marcos që përfundon në 2028.