Vendimi është marrë më datë 17 prill 2024, por u zbulua vetëm dje sipas mediave kosovare. Zëdhënësja e kësaj gjykate, Mirlinda Gashi ka konfirmuar zhvillimet, raportoi agjencia INA.

”Referuar kërkesës tuaj për informata, ju njoftojmë se pas kërkesës së Prokurorisë Themelore në Prishtinë për vazhdimin e masës së paraburgimit në çështjen penale kundër të pandehurve N.M, G.P dhe K.K, Gjykata Themelore në Prishtinë – Departamenti për Krime të Rënda me datë 23.04.2024 ka marr Aktvendim dhe ka aprovuar kërkesën e Prokurorisë Themelore Prishtinë, ashtu që masa e paraburgimit tre të pandehurve iu është vazhduar në kohëzgjatje prej 2 (dy) muaj. e cila masë iu është llogaritur nga data 28.04.2024 deri me 27.06.2024″, tha Gashi.

Tom Dedaj, tashmë do të mbrohet në liri, sipas një vendimi të Gjykatës Supreme të Kosovës, me të cilin është ndryshuar vendimi i Gjykatës Themelore të Prishtinës dhe Gjykatës së Apelit të Kosovës.

Ngjarja e rëndë ndodhi më 29 nëntor 2023, ku Naim Murseli, dyshohet se ka urdhëruar vrasjen e gruas së tij Liridona Ademaj, teksa e shiti si një grabitje të dështuar.

Sipas prokurorisë, derisa Naim Murseli me bashkëshorten dhe dy fëmijët ishin në makinën e tyre, papritmas del para veturës i dyshuari Granit Plava me masë në kokë dhe revole në dorë, ku sipas marrëveshjes paraprake i pandehuri Naim Murseli me fëmijë ka dalë nga vetura dhe është larguar nga vendi i ngjarjes për të ikur, ndërsa në veturë ka mbetur e ndjera Liridona Murseli.

Media më herët në dëshmitë e siguruara kishte raportuar se Tom Dodaj, ka pranuar se ia ka shitur armën e krimit Naim Murselit e Granit Plavës. Ai kishte mohuar të jetë i përfshirë në vrasjen e Liridona Ademajt, teksa thekson se armën ia ka shitur për 280 euro.

“Vlera e armës ka qenë 250 Euro, ndërsa fishkët ia kam shitur për 30 Euro“, thuhet në dëshminë e Dodajt. Autori kishte ndjekur çiftin deri në restorant atë natë, teksa autori ka dëshmuar se Murseli insistonte për eliminimin e Liridonës. Prej kohësh çifti që jetonte kryesisht në Suedi, teksa zotëronin edhe biznese, kishin probleme familjare. janë hedhur dyshime se Liridona e kërcënonte Murselin me sekretet që dinte për të. /ZOOM.AL/