8 marsi, një ditë për të festuar arritjet sociale dhe politike të gruas, por edhe për të mos harruar diskriminimin dhe dhunën që sot është aktuale në botë.
Legjenda e një sakrifice
Mes legjendeva më të njohura për zgjedhjen e pikërisht kësaj ditë është ajo e një ngjarjeje të zymtë që lidhet me vdekjen e 100 punëtoreve në një fabrikë në Nju Jork. Pasi kishin bërë grevë prej ditësh për të drejtat e tyre, punëtoret vdiqën për shkak të një zjarri të fuqishëm në vendin ku ishin bllokuar nga pronari për t’i ndaluar që të dilnin. E tmerrshme, por për fat të mirë jo e vërtetë.
Në Rusinë e ftohtë
Një tjetër hipotezë e lidh festën me një manifestim në Shën Petërburg më 23 shkurt 1917, datë që korrespondon me 8 marsin sot, gjatë së cilës gratë ruse dolën në rrugë për të protestuar kundër urisë dhe kërkuar kthimin në shtëpi nga lufta të djemve dhe burrave.
E vërteta është se…
Festimi i 8 marsit nisi në vitin 1910, kur në Konferencën Ndërkombëtare të Grave Socialiste u vendos “Dita ndërkombëtare e Gruas” me objektivin për të pasur barazi me burrat, veçanërisht të drejtën e votës.
Na pëlqen e verdha…
Zgjedhja e mimozave si lule simbol është pikërisht fakti se këto lule lulëzojnë në ditët e para të marsit, por edhe se janë ekonomike. Por mimoza ka dhe një tjetër domethënie, ajo arrin të lulëzojë edhe në terrene të vështira. E fortë dhe e bukur, njësoj si gruaja.
Të lidhura
