Intuita shumë e zhvilluar është një “armë e fshehtë”, thotë Judith Orloff, profesoreshë e psikiatrisë. “Kjo ju jep të gjitha llojet e informacioneve që normalisht nuk do t’i kishit. Nuk është analizimi i trurit, por njohuri jolineare. Është një lloj i dytë i inteligjencës. Ju do donit t’i përdorni të dyja.”

Po nëse jeni dikush që varet vetëm nga analiza dhe jo shumë intuitiv? Asgjë për t’u shqetësuar. Ka teknika të thjeshta që mund të përdorni për të zhvilluar intuitën tuaj dhe për të filluar të dëgjoni më mirë veten.

Njerëzit mund të zhvillojnë intuitën e tyre edhe nëse mendojnë se nuk e kanë”, shprehet Orloff. “Në thelb, intuita është një tërësi mesazhe që vijnë nga ana e djathtë e trurit dhe të gjithë e kemi këtë anë.”

Këto janë 5 hapa të thjeshtë që mund të zhvillojnë intuitën:

1. Dëgjoni zorrën tuaj. Po, e lexuat mirë.

Amerikanët përdorin “trust your gut” – fjalë për fjalë përkthehet: “Besojini zorrës suaj”, ndërsa kuptimi i përgjithshëm: “Besojini zërit tuaj të brendshëm”.

Sidoqoftë, këtu e kemi fjalën për zorrët, në kuptimin e parë (dhe të dytë) të fjalës.

Besoni ose jo, sistemi juaj i tretjes mund të ndihmojë në përmirësimin e intuitës tuaj.

“Ka neurotransmetues në zorrën tuaj, kështu që nëse keni atë ndjesinë e çuditshme në bark, nuk është mirë ta injoroni”, thotë Orloff.

Përmirësoni atë aspekt të intuitës tuaj duke u konsultuar me zorrën tuaj kur keni vendime për të marrë. Për shembull, nëse po punësoni dikë, vendosni një synim para intervistës për të dëgjuar me mendjen dhe zorrën tuaj. “Vini re ndjesitë fizike në atë zonë dhe pyesni veten se si ju bën të ndiheni ky person. A ndiheni i qetë, rehat etj.

Një klient i Orloff ishte gati të hynte në një marrëveshje të madhe biznesi, por “zëri i tij i brendshëm” vazhdimisht i thoshte që të qëndronte larg. Ai vendosi të presë dhe doli se njeriu me të cilin ishte gati të shkonte në biznes ishte një mashtrues.

2. Vëzhgoni nivelet tuaja të energjisë.

Kushtojini vëmendje nëse të qenit pranë dikujt ju bën të ndiheni të lodhur apo energjik dhe të gjallë, sugjeron Orloff. Disa njerëz, thotë ajo, janë vampirë energjie që do të thithin nga jeta juaj dhe do t’ju tërheqin poshtë.

“Nëse nuk ndiheni mirë pranë dikujt, intuita po përpiqet t’ju tregojë diçka,” vëren ajo.

3. Kushtojini vëmendje momenteve të “iluminimit”

Intuita zakonisht na vjen në formën e një depërtimi. Janë ato momente kur themi “Ahaa”, teksa një llampë imagjinare po na ndriçon mbi kokë. Këto mendime dhe ide vijnë papritur, për shembull: “Duhe të telefonoj dikë. Ky person mund të më ndihmojë me projektin tim.” Kur këto momente vijnë, mos i lini t’ju ikin. Shkruajini nëse s’i realizoni dot në moment dhe ndiqini vazhdimisht.

4. Bëni një meditim tre minutësh.

“Edhe 3 minuta të qeta në ditë mund t’ju bëjnë të kontaktoni me intuitën tuaj”, thotë Orloff. Nëse edhe kjo është shumë sfiduese, të paktën qëndroni vetëm për disa çaste. Bëni një shëtitje, ose një dush të gjatë. Orloff thotë se ajo vetë e bën këtë kur dëshiron të angazhojë intuitën e saj.

“Unë kam nevojë të jem e ndarë nga njerëzit e tjerë dhe të akordohem,” shpjegon ajo.

5. Zhvilloni trurin

Ushqeni trurin me dokumentarë, libra dhe gjithçka edukuese/zhvilluese. Mund të mos i mbani mend gjithë njohuritë që merrni, por ato ruhen diku në ndërgjegjen tuaj dhe në të ardhmen, ju ndihmojnë për të marrë vendime më të mira intuitve.